Xarici xəbərlər

Paşinyan AŞPA-nın Baş katibi ilə görüşüb – Ermənistan hökumətindən açıqlama

Ermənistanın Baş naziri Nikol Paşinyan Avropa Şurası Baş katibi Alen Berse ilə Strasburqda görüş keçirib. Crossmedia.az xəbər verir ki, bu barədə Ermənistan hökumətinin rəsmi mətbuat xidməti məlumat yayıb.

Görüş zamanı Alen Berse Paşinyanın Strasburqa səfərini alqışlayaraq, Avropa Şurası ilə Ermənistan hökuməti arasında formalaşmış aktiv və səmərəli əməkdaşlığı yüksək qiymətləndirib. Onun sözlərinə görə, bu əməkdaşlıq Ermənistan Respublikasında institusional islahatların bütün sahələrdə irəliləməsinə töhfə verib. Berse əminliyini ifadə edib ki, ikitərəfli əməkdaşlıq çərçivəsində nəzərdə tutulan proqramlar gələcəkdə də uğurla həyata keçiriləcək.

Baş nazir Nikol Paşinyan səmimi qəbula görə təşəkkür edərək bildirib ki, bu səfər 2019-cu ildən sonra ikinci dəfə baş tutur və Ermənistan üçün önəmli bir mərhələyə təsadüf edir. Onun sözlərinə görə, son beş ildə ciddi çağırışlardan çıxan Ermənistan bu gün inkişafında dönüş nöqtəsindədir. Paşinyan qeyd edib ki, Ermənistan Avropa Şurasını öz demokratik inkişafında strateji tərəfdaş kimi görür və bu qurumun demokratiya, insan hüquqları və hüququn aliliyinin möhkəmləndirilməsi sahəsindəki rolunu yüksək qiymətləndirir.

Tərəflər Ermənistan–Avropa Şurası arasında əməkdaşlıq fəaliyyət proqramının effektiv icrasını müsbət dəyərləndirib və demokratik islahatlarla bağlı ikitərəfli gündəlikdəki məsələləri müzakirə ediblər.

Alen Berse, həmçinin Ermənistan və Azərbaycan arasında sülh sazişinin paraflanmasını alqışlayaraq, bu addımın Cənubi Qafqazda yeni reallıqlar yaradacağına və regionun inkişafı üçün geniş imkanlar açacağına ümid etdiyini bildirib.

🖨 Çap et

18:14 29.09.2025

Oxunuş sayı: 2922