Azərbaycanda “Chrome” liderliyini qoruyur, “Opera” bazar payını itirir
2025-ci ilin avqust ayında Azərbaycanda bütün platformalarda (kompüter, mobil cihaz və planşet) “Chrome” brauzerinin bazar payı 78,78 % olub. Bu göstərici iyul ayına nisbətən 0,50 faiz bəndi artsa da, 2024-cü ilin avqust ayı ilə müqayisədə 0,41 faiz bəndi azalıb. İkinci yerdə “Safari” (9,48 %), üçüncü yerdə “Samsung Internet” (3,65 %), dördüncü yerdə “Opera” (2,64 %), beşinci yerdə isə “Edge” (1,95 %) qərarlaşıb. Platformalara görə liderlik isə belədir: kompüterlərdə “Chrome” 82,32 %, mobil cihazlarda 77,11 %, planşetlərdə isə 75,05 % bazar payına malikdir.
Təqdim olunan reytinq barədə Crossmedia.az saytına açıqlama verən İnformasiya Texnologiyaları mütəxəssisi Elvin Abbasov bildirib ki, “Opera” brauzerinin Azərbaycanda bazar payının azalmasının əsas səbəbləri bir neçə amillə bağlıdır: “İlk növbədə "Chrome Google"-un geniş ekosisteminə inteqrasiya olunması, sürət və rahat sinxronizasiya imkanları ilə istifadəçilər üçün daha cəlbedici qalır. Paralel olaraq, "Microsoft Edge" ə "Firefox" kimi alternativlərin təhlükəsizlik, batareya optimizasiyası və məxfilik üstünlükləri güclənib. Bu isə "Opera"nın fərqləndirici funksiyalarını əvvəlki qədər unikal etmir, çünki reklam bloklama və daxili VPN kimi imkanlar artıq digər brauzerlərdə də standart halına gəlib. Gələcəkdə "Opera" və oxşar alternativlərin bazarda rəqabət edə bilməsi üçün daha ixtisaslaşmış üstünlüklərə, məsələn, Web3 dəstəyi, kripto-cüzdan inteqrasiyası və süni intellekt əsaslı xidmətlərə yönəlməsi vacibdir. Lakin ümumi mənzərə göstərir ki, "Chrome" yaxın gələcəkdə də lider mövqeyini qoruyacaq, alternativlər isə əsasən niş istifadəçi qrupları üçün cəlbedici qalacaq”.
Mehriban Yariyeva
15:02 02.09.2025
Oxunuş sayı: 3729
