Balakəndə Amerika ağ kəpənəyinə qarşı mübarizə tədbirləri gücləndirilib
Avqust ayından başlayaraq Balakən və Zaqatala rayonlarının meşəlik ərazilərində karantin zərərvericisi olan Amerika ağ kəpənəyinə təsadüf edilməyə başlanılıb.
Crossmedia.az xəbər verir ki, tırtıllı qurdabənzər bu kəpənəklər təsərrüfatlara yaxınlıqdakı meşəliklərdən yayılıb və hər gün sayları artmaqdadır. Bu ağ kəpənəklər-qurdlar evlərə də hücum çəkir, qışlama üçün yer seçirlər. Əməkdaşımız məsələ ilə bağlı Balakənin bir sıra yaşayış məntəqələrində müşahidələr aparıb. Amerika ağ kəpənəyinə qarşı fitosanitar müşahidə və mübarizə tədbirləri ilə maraqlanıb.
Bu kəpənəklər hazırda fındıq, tut, gavalı, eləcə də meşəliklərdə bitən müxtəlif çoxillik ağacların yarpaqlarını yeyərək onu məhv edir.
Balakənin üç ən iri yaşayış məntəqələrini birləşdirən Kortala bələdiyyəsinin sədri Elşad Balayev görülən tədbirlərə, qabaqlayıcı dərmanlamaya baxmayaraq zərərvericinin sayının hər gün artdığını söyləyir: “Bizim bələdiyyə üç kəndi əhatə edir. Amerika kəpənəyi bağları, həyətyanı sahələri, hər bir yeri götürüb. Ağacların yarpaqlarını yeyib məhv edir. Sakinlərdən eşitdiyimə görə, bir il əvvəl bu ağaclarda görünüb, həmən ağaclarda bu il məhsuldarlıq aşağı düşüb və qurumağa doğru gedib. Əgər belə bir tendensiya ilə çoxalmağa gedərsə, yəqin ki, növbəti illərdə ağacların çoxu quruyub məhv olacaq”.
Aqrar Xidmətlər Agentliyinin Balakən Regional Bitki Mühafizəsi və Fumiqasiya Mərkəzinin rəisi Turac Səfərli bildirir ki, Balakən və Zaqatala rayonlarında meşə fondu ərazilərində Amerika ağ kəpənəyinə qarşı aparılan mübarizə tədbirlərinə dəstək göstərilməsi ilə bağlı Ekologiya və Təbii Sərvətlər Nazirliyinin müraciəti əsasında Aqrar Xidmətlər Agentliyi tərəfindən müvafiq dərman preparatları ayrılıb, texniki vasitələr mübarizə tədbirlərinə cəlb olunub. Həmçinin monitorinqlərə və mübarizə tədbirlərinə Agentliyin yerli mütəxəssisləri cəlb edilib: “İki həftəyə yaxındır ki, rayonumuza Amerika ağ kəpənəyi karantin zərərvericisi haqqında məlumat gəlib. Bu məlumata əsasən mübarizə tədbirlərinə başlamışıq. Kəpənəyin yayılma arealı meşələrdə və meşələrə yaxın fındıq bağlarında müşahidə olunur. Hazırda 150 hektardan çox ərazidə kimyəvi mübarizə tədbirləri gedir. Kimyəvi mübarizə tədbirləri meşələrdə, meşələrə yaxın fındıq bağlarında tətbiq olunur”.
Zərərvericinin hər nəslinə qarşı insektisidlərə həssas kiçikyaşlı tırtılların kütləvi əmələ gəlməsi dövründə dərmanlama aparmaq daha səmərəlidir. Payızda gövdəətrafı və cərgə aralarında torpaq şumlanmalıdır. Onun yayılmasının qarşısını almaq üçün karantin, aqrotexniki, mexaniki, bioloji və kimyəvi mübarizə üsullarından sistemli şəkildə tətbiqi zəruridir.
Ümumilikdə isə bağlarda, parklarda, həyətyanı sahələrdə, meşə zolaqlarında, tingliklərdə və digər yerlərdə zərərverici aşkar edildiyi hallarda aidiyyəti yerli qurumlara məlumat verilməlidir. Yeni aşkar olunmuş mənbələrdə təcrid və ləğvedici tədbirlərin həyata keçirilməsi mühüm əhəmiyyət daşıyır.
16:43 30.08.2025
Oxunuş sayı: 8312
