"Özbəkistan hökuməti ilə Azərbaycan diasporu arasında əməkdaşlıq son illərdə daha da güclənib"
"Özbəkistan hökuməti ilə Azərbaycan diasporu arasında əməkdaşlıq son illərdə daha da güclənmiş və sistemli xarakter almışdır. Bu əməkdaşlıq ilk növbədə qarşılıqlı hörmətə, dostluğa və ortaq tarixi-mədəni dəyərlərə əsaslanır. Özbəkistan Respublikası rəhbərliyi diaspor təşkilatlarını ölkənin ictimai-mədəni həyatında fəal iştirak edən tərəfdaş kimi görür və bu baxımdan bizə hər zaman açıq dəstək göstərir".
Bu fikirləri Azərbaycan diaspor təşkilatının rəhbəri, Respublika Azərbaycan Milli Mədəniyyət Mərkəzinin (RAzMMM) İdarə Heyətinin sədri Mobil Məmmədov Crossmedia.az- a geniş müsahibəsində deyib.
"RAzMMM olaraq, biz Özbəkistanın Millətlərarası Münasibətlər və Xorijdə Yaşayan Həmvətənlərlə İş üzrə Komitəsi, Mədəniyyət Nazirliyi, Təhsil Nazirliyi, və digər dövlət qurumları ilə daimi əlaqədəyik. Hökumət nümayəndələri diasporun təşəbbüslərini diqqətlə izləyir və bir çox layihələrin həyata keçirilməsində bizimlə yaxından əməkdaşlıq edirlər. Həmçinin, hər iki ölkə arasında diplomatik münasibətlərin yüksək səviyyədə olması da diasporun fəaliyyətinə müsbət təsir edir. Azərbaycan səfirliyi ilə birlikdə dövlət tədbirlərində, mədəniyyət günlərində və tarixi günlərin qeyd edilməsində birgə iştirak edirik. Əməkdaşlığın əsas istiqamətlərindən biri də mədəni layihələrin təşkili, təhsil proqramları və gənclərlə iş sahəsindədir. Azərbaycan dilinin, mədəniyyətinin, tarixi irsinin Özbəkistanda tanıdılması istiqamətində keçirilən tədbirlərə hökumət orqanları tərəfindən həm təşkilati, həm də texniki dəstək göstərilir. Bu əməkdaşlıq, eyni zamanda, TDT çərçivəsində həyata keçirilən regional təşəbbüslər fonunda daha da güclənməkdədir. Özbəkistan hökumətinin türk dünyasına bağlılığı və ortaq dəyərlərə verdiyi önəm, bizə – diaspor təşkilatlarına da yeni imkanlar və platformalar təqdim edir. Bir sözlə, Özbəkistan hökuməti ilə diasporumuz arasındakı münasibətlər qarşılıqlı etimad və əməkdaşlıq ruhunda davam edir və bu, Azərbaycan–Özbəkistan dostluğunun möhkəmlənməsində mühüm rol oynayır", - o bildirib.
Mehriban Yariyeva
Müsahibənin geniş versiyasını aşağıdakı linkdən oxuya bilərsiniz:
https://crossmedia.az/az/article/42822
14:29 29.08.2025
Oxunuş sayı: 12373
