Yeni tədris ili öncəsi valideynlərə vacib tövsiyələr – Ekspert
Yeni tədris ili yaxınlaşır və bu dövr həm valideynlər, həm də məktəblər üçün ciddi hazırlıq mərhələsidir. Məktəbə hazırlıq sadə məsələ deyil, xüsusilə də ilk dəfə birinci sinfə qədəm qoyacaq uşaqlar üçün. Onlar ilk dəfə məktəb mühitinə daxil olacaqlar və bu, həm psixoloji, həm də sosial baxımdan mühüm mərhələdir.
Bu sözləri Crossmedia.az-a açıqlamasında təhsil eksperti İlqar Orucov bildirib.
Ekspertin sözlərinə görə, üç aylıq tətil dövrü nisbətən qısa vaxtdır və şagirdlər bu müddətdə məktəbdən uzaq qaldıqları üçün yenidən məktəb həyatına alışmaqda çətinlik çəkə bilirlər. Bu xüsusilə ibtidai sinif şagirdlərinə aiddir, çünki onların psixoloji həssaslığı daha yüksəkdir.
“Valideynlərin üzərinə böyük məsuliyyət düşür. Uşaqları məktəbə yalnız fiziki baxımdan deyil, həm də psixoloji və emosional cəhətdən hazırlamaq vacibdir. Çünki məktəb mühiti evdən fərqlidir və uşaq üç aylıq fasilədən sonra adaptasiya prosesi keçirir. Valideyn övladına sadəcə qayğı göstərən deyil, həm də dost olmalıdır. Həm özlərini məktəbin bir parçası kimi hiss etməli, həm də övladlarının yaş xüsusiyyətlərini nəzərə alaraq onları düzgün istiqamətləndirməlidirlər.
Valideyn olmaq yalnız uşaq dünyaya gətirmək deyil, onun təlim-tərbiyəsində, ümumi inkişafında, şəxsiyyət kimi formalaşmasında da fəal iştirak etmək deməkdir. Bunun üçün valideynlər daim mütaliə etməli, uşaqların fərqli yaş dövrlərində qarşıya çıxan psixoloji və fizioloji ehtiyacları öyrənməlidirlər. Çünki bəzən sadə görünən bir psixoloji travma gələcəkdə uşağın şəxsiyyətinə mənfi təsir göstərə bilər.
Valideynlər övladlarını dinləməli, onların suallarını cavablandırmalı, psixoloji zəifliklərini vaxtında müəyyənləşdirməlidirlər. Əgər hər hansı çətinlik yaranarsa, mütləq məktəb pedaqoqları və psixoloqlara müraciət olunmalıdır”, – Orucov vurğulayıb.
Ekspertin sözlərinə görə, valideynlər övladlarının dərs ləvazimatlarını alarkən yalnız qiymət məsələsinə deyil, həm də keyfiyyətinə diqqət yetirməlidirlər. Keyfiyyətsiz məhsullar uşaqların sağlamlığına mənfi təsir göstərə bilər:
"Məktəb geyimləri və çantalarının seçimi zamanı valideynlər uşağın rahatlığını və sağlamlığını əsas tutmalıdırlar. Çünki ağır və uyğun olmayan çantalar onurğa sütununa zərər verə bilər. Uşaqların bədən quruluşuna uyğun, yüngül və təhlükəsiz çantalar seçilməlidir".
İlqar Orucov əlavə edib ki, şagirdlərin yeni tədris ilinə sistemli və məqsədyönlü şəkildə hazırlaşmaları vacibdir:
“Ən önəmli məsələlərdən biri vaxtın düzgün bölünməsidir. Uşaqlar balanslı qidalanmaya, müntəzəm idmana, yaxşı yuxuya və texnologiyadan düzgün istifadəyə diqqət etməlidirlər. Texnologiya həyatımızın bir hissəsidir, amma mobil telefon və oyunlara həddindən artıq vaxt sərf etmək olmaz. Əsas diqqət öyrənməyə və biliklərin artırılmasına yönəlməlidir”.
Ekspertin fikrincə, valideynlərin bu məsələlərə həssas yanaşması uşaqların gələcək uğurlarına birbaşa təsir göstərəcək:
“Mən çox arzulayıram ki, bütün şagirdlər yeni tədris ilinə motivasiyalı, hazırlıqlı və məqsədyönlü şəkildə başlasınlar. Onların gələcək uğuru məhz bu vərdişlərin formalaşdırılmasından asılıdır”.
Nihat Tahirov
09:41 27.08.2025
Oxunuş sayı: 772
