Sosium

Çimərliklər çirkləndirilir: Özümüz öz qazdığımız quyuya düşürük - Ekoloji problem!

Paytaxtın Xəzər, Qaradağ, Xətai rayonlarında və Sumqayıt şəhərində sahilboyu ərazilərdə aparılan növbəti tədbirlər zamanı məişət tullantılarının təyin olunmuş yerlərdən kənara atılması halları aşkar edilib. İnsanlar istirahət zamanı çox vaxt düşünmədən təbiətə ziyan vura bilirlər. Bu halların qarşısının alınması üçün qanunvericilikdə müəyyən cəza tədbirləri olsa da bu problemin həlli üçün kifayət deyil. Bəs nə etmək lazımdır? Bu tullantılar hansı ekoloji problemi gətirə bilərlər?

Mövzu ilə bağlı sosioloq Rəvan Əliyev Crossmedia.az saytına açıqlama verib:

“Paytaxtın Xəzər, Qaradağ, Xətai rayonlarında və Sumqayıt şəhərində sahilboyu ərazilərdə məişət tullantılarının təyin olunmuş yerlərdən kənara atılması faktı bir daha göstərir ki, tullantıların idarə olunması təkcə inzibati deyil, həm də sosial məsələdir. Cəmiyyətin bütün təbəqələrini əhatə edən davamlı ekoloji maarifləndirmə işləri aparılmalıdır. İnsanlar tullantının təbiətə vurduğu zərəri dərk etməlidirlər. Qanunvericiliyə uyğun şəkildə cərimələrin tətbiqi və onların effektiv icrası gücləndirilməlidir. Tullantı atan şəxslərin aşkarlanması üçün müşahidə kameraları və ictimai nəzarət alətləri istifadəyə verilə bilər. Sahilboyu ərazilərdə kifayət qədər və əlçatan zibil qutuları qurulmalıdır. İnsanların alternativsiz buraxılması bu problemi artırır. Könüllülər vasitəsilə sahil təmizliyi aksiyaları təşkil olunmalı və ictimai iştirakçılıq dəstəklənməlidir. İnsanlar təmizliyə görə məsuliyyət hiss etməlidir”.

Ekspert həmçinin bildirib ki, bu halların mütəmadi təkrarlanması bir sıra ciddi ekoloji problemlərə işarə edir: "Məsələn, dəniz və su hövzələri çirklənir. Bu, həm canlıların məhvinə, həm də bioloji tarazlığın pozulmasına gətirib çıxarır. İkinci bir tərəfdən, torpaq və hava keyfiyyətinin pisləşir. Belə ki, məişət tullantıları parçalandıqca toksik maddələr yayılır. Eyni zamanda çirkli sahillər həm insan sağlamlığına, həm də iqtisadi gəlirlərə mənfi təsir göstərir. Unutmayaq ki, bu cür hallar cəmiyyətin ekoloji məsuliyyətinin səviyyəsini də göstərir. Əgər bu məsələyə ciddi yanaşmasaq, gələcək nəsillər üçün yaşana biləcək ətraf mühiti itirmiş olarıq. Bu səbəbdən həm dövlət strukturları, həm də vətəndaş cəmiyyəti birlikdə fəaliyyət göstərməlidir”.

Ayhan

🖨 Çap et

16:47 26.07.2025

Oxunuş sayı: 1045