Bu sərəncam xarici ölkələrin universitetləri ilə əməkdaşlıq əlaqələrini genişləndirəcək -AÇIQLAMA
Prezident İlham Əliyevin imzaladığı yeni Sərəncama əsasən,
Azərbaycanda ali təhsil sahəsində beynəlxalq ikili diplom proqramlarının sayı
artırılacaq. Bu addım “Azərbaycan Respublikasının 2022–2026-cı illərdə
sosial-iqtisadi inkişaf strategiyası”na uyğun olaraq atılır. Sənədə əsasən, belə
proqramların sayı 8-ə çatdırılacaq və onların həyata keçirilməsi 2030-cu ilədək
davam edəcək.
Mövzu ilə bağlı təhsil eksperti Elçin Əfəndi Crossmedia.az-a açıqlama verib. E.Əfəndi ikili diplom proqramlarının tətbiqinin təhsil keyfiyyətinə və kadr hazırlığına mühüm töhfə verəcəyini söyləyib:
“Dövlət başçısının müvafiq olaraq ikili diplom proqramı ilə bağlı sərəncamı artıq ali təhsil müəssisələrinə imkan yaradacaq ki, onlar digər xarici ölkələrin universitetləri ilə əməkdaşlıq etsinlər. O cümlədən həmin universitetlərin müəllim professor heyətinin bizim ölkənin ali təhsil müəssisələrində çalışması və ya bizim müəllim professor heyətimizin həmin ölkələrin universitetləri ilə əməkdaşlığı, tələbə mübadiləsi, tələbələrin təkcə ölkənin ali təhsil müəssisəsində deyil həm də əməkdaşlıq edilən xarici universitetlərdə 1 kurs və ya 1 semestr təhsil almaqları və s. imkanlarının yaradılması deməkdir. Bu da ümumilikdə təhsil keyfiyyətinə və kadr hazırlığına mühüm töhfə verəcək”.
Təhsil məsələləri üzrə mütəxəssis açıqlamasında bildirib ki, bu proses davamlı şəkildə həyata keçirilməli və dayanıqlılıq qorunub saxlanılmalıdır:
"Təkcə bir və yaxud bir neçə universitet deyil, dünyanın nüfuzlu ali təhsil müəssisələri, xarici ölkələrin profilləşən istiqamətlər üzrə formalaşan universitetləri ikili diplom proqramı çərçivəsində tətbiq olunan tələbə mübadiləsi, kadrların müəyyən müddət xaricdə əməkdaşlıq olunan universitetlərə yönləndirilməsi və s. təşkil olunmalıdır ki, sistem davamlı olsun və növbəti proseslərdə də iştiraklılıq təmin olunsun”.
Nicat Rüstəmzadə
15:25 23.07.2025
Oxunuş sayı: 7233
