Dövlət orqanlarında ümumi müsahibələrin keçirilmə qrafiki müəyyən edilib
İyunun 12-də elan edilmiş ümumi müsahibələrin keçirilmə qrafiki müəyyən edilib.
Crossmedia.az Dövlət İmtahan Mərkəzinə istinadən xəbər verir ki, elan üzrə 95 dövlət orqanında mövcud olan 481 vakant vəzifə ümumi müsahibəyə çıxarılıb. Elana çıxarılan vəzifələr üzrə namizədlərlə 1026 müsahibənin keçirilməsi planlaşdırılır.
Ən yüksək müsahibə sayı Bakı Şəhər İcra Hakimiyyəti, Sənədlərlə və vətəndaşların müraciətləri ilə iş şöbəsi, Vətəndaşların qəbulu və müraciətləri ilə iş sektoru, məsləhətçi (1 vakant yer üzrə 63 namizəd), Azərbaycan Dövlət Su Ehtiyatları Agentliyi, Daxili nəzarət və audit şöbəsi, aparıcı məsləhətçi (1 vakant yer üzrə 42 namizəd) vəzifələri üzrə qeydə alınıb.
Müsahibələrin iyulun 21-dən sentyabrın 11-dək keçirilməsi planlaşdırılır.
Namizədlər müsahibə vaxtı və yeri haqqında daha ətraflı məlumatı buradan əldə edə bilərlər.
Nəzərə almaq lazımdır ki, müsahibələrin təşkili və keçirilməsi üçün Dövlət İmtahan Mərkəzi və dövlət orqanları tərəfindən kifayət qədər vəsait və resurslar sərf olunur. Mərkəz namizədlərin diqqətinə çatdırır ki, onların müsahibədə iştirak etməmələri üzrlü hal kimi qəbul edilmir, namizədlərin məsuliyyətsizliyi kimi xarakterizə edilir və belə hallar Mərkəzin məlumat bazasında qeydiyyata alınır.
Namizəd müsahibə keçirilmə tarixindən bir gün əvvəl saat 16:00-dək müsahibələrin keçirilmə qrafikində şəxsi kabinetinin nömrəsini seçib açılan müraciət formasında “İMTİNA” düyməsini basmaqla müsahibədə iştirakdan imtina edə bilər.
Müsahibədə üzrlü səbəblərdən iştirak etməyən namizədlə həmin vakant vəzifə üzrə (elan edilmiş cari müsahibə üzrə) yeni müsahibənin təşkili yalnız müvafiq təsdiqedici sənəd nəzərə alınmaqla həyata keçirilə bilər.
Namizədlərdən müsahibənin başlanma vaxtından azı 30 dəqiqə əvvəl müsahibələrin keçiriləcəyi binaya yaxınlaşmaları xahiş olunur.
19:38 14.07.2025
Oxunuş sayı: 5034
