Vərəsəlik haqqında qanun dəyişdi - Bunları bilmək VACİBDİR!
Prezident İlham Əliyev Torpaq, Mülki Prosessual və Mülki Məcəllələrə, eləcə də “Notariat haqqında” və “İcra haqqında” qanunlara dəyişiklikləri təsdiqləyib.
Məsələ ilə bağlı hüquqşünas Xəyalə Hənifəli Crossmedia.az-a açıqlama verib. O bildirib ki, bu dəyişikliklər miras hüququ ilə bağlı haqsızlıqların qarşısını alır, vərəsələrin hüquqlarını bərabərləşdirir və qanunvericilikdə daha humanist yanaşma yaradır. Qanun dəyişikliyi miras hüququ sahəsində yeni mərhələnin əsasını qoyur: “Bu dəyişikliklər vətəndaşların hüquqlarının qorunması baxımından mühüm əhəmiyyət daşıyır. Cənab Prezident İlham Əliyevin atdığı hər bir hüquqi addım insanlarımızın rifahına və hüquqlarının daha da möhkəmləndirilməsinə xidmət edir.
Dəyişikliyə əsasən, miras şəriklərinə vərəsəlik şəhadətnaməsi verilməsi zamanı şəhadətnamə almaq üçün müraciət etməmiş şəxslərin də hüquqları təmin olunacaq. Bu, bəzən vərəsə olduqlarından xəbərsiz olan şəxslərin lehinə işləyəcək.Əvvəllər bir vərəsə digərinin hüququnu bilərəkdən və ya bilməyərək mənimsəyə bilirdi. İndi isə notarius şəhadətnamə verərkən digər vərəsələrin də payını müəyyən edəcək və bu şəhadətnamədə əks olunacaq”.
Hüquqşünas onu da bildirdi ki, Mülki Məcəllənin 1325.2-ci maddəsinə əsasən, daşınmaz və daşınar əmlakın reyestrlərinə vərəsələr və onların payları barədə məlumat daxil ediləcək:
“Eyni zamanda, mirasın siyahıya alınması ilə bağlı vərəsənin müraciət qaydaları da dəyişib. Artıq hər bir miras şəriki öz payına dair vərəsəlik şəhadətnaməsi ala biləcək. Bu dəyişikliklər vətəndaşların miras hüquqlarının daha şəffaf və ədalətli şəkildə təmin olunmasına imkan verəcək”.
Hüquqşünas sonda vurğuladı ki, digər diqqətçəkən dəyişikliklərdən biri də irsi transmissiya ilə bağlı müddətlərin yumşaldılmasıdır. Əgər vərəsə miras açıldıqdan sonra ölərsə, onun payı artıq öz vərəsələrinə ümumi qaydada keçəcək. İmtina müddəti isə üç aya qədər uzadıla biləcək:
“Bundan əlavə, aşağıdakı hüquqi məhdudiyyətlər aradan qaldırılıb:
• İrsi transmissiya üzrə mirasın qəbul edilməməsi vərəsəni hüquqdan məhrum etmir;
• Əmlakı almaqdan imtina edildikdə, həmin əmlak digər mirasçılara keçir;
• Mirasdan imtina edilmədikdə, miras avtomatik qəbul olunmuş sayılır.
Prezident İlham Əliyevin imzaladığı fərmanla dəyişikliklərin tətbiqi təmin olunacaq. Hüquqşünas Xəyalə Hənifəlinin sözlərinə görə, bu addımlar Azərbaycan hüquq sistemində bərabərlik, şəffaflıq və hüquqi təminatların daha da gücləndirilməsinə yönəlib”.
Həmayıl Şükürlü
10:47 14.07.2025
Oxunuş sayı: 12080
