Taksi sürücüləri sərhədi aşır: “Etik qaydaları bilirlər, amma yenə də pozurlar”
Son dövrlər Bakıda və ümumilikdə ölkə ərazisində taksi sürücüləri ilə bağlı narahatedici halların artması müşahidə olunur. Xüsusilə qadın sərnişinlərə qarşı etikadan kənar davranışlar, nalayiq ifadələr və təhqiramiz münasibətlər getdikcə daha geniş rezonans doğurur.
Sosial şəbəkələrdə, xəbər portallarında və müxtəlif rəqəmsal platformalarda bu mövzuda yayımlanan şikayətlər və video-görüntülər artıq narahatlıq doğuran bir tendensiyanı ortaya qoyur. Sürücülərin sərnişinlərlə, xüsusilə də qadınlarla peşə fəaliyyətindən kənara çıxaraq “səmimiyyət qurmağa” cəhd etməsi, xidmətə aidiyyəti olmayan söhbətlər açması və bəzən açıq-aşkar qeyri-etik təkliflərlə çıxış etməsi adi hala çevrilməkdədir.
Məsələnin daha təhlükəli tərəfi ondadır ki, bəzi sürücülər bu cür davranışları normallaşdırır, onu xidmətin bir hissəsi kimi qəbul edirlər. Halbuki taksi xidməti ictimai xidmət sahələrindən biridir və burada sərnişinlə sürücü arasında sərhədli münasibət hökm sürməlidir.
Qadın sərnişinlərin bu cür hallarla rastlaşdığı zaman polis orqanlarına etdiyi müraciətlər nəticəsində artıq bir neçə sürücünün məsuliyyətə cəlb edildiyi məlumdur.
Bəs belə halların baş verməsində məsuliyyət kimlərin üzərindədir?
Mövzu ilə bağlı Crossmedia.az-a danışan nəqliyyat eksperti Elməddin Muradlı məsələni şərh edərək bildirib:
“Bu hallar heç bir halda qəbuledilən deyil. Təəssüf ki, son zamanlar oxşar situasiyalarla daha tez-tez qarşılaşırıq. Müsbət məqam ondan ibarətdir ki, qadın sərnişinlər artıq bu kimi hallarda hara və necə müraciət etməli olduqlarını bilirlər. Faktlar təqdim olunur, hüquq-mühafizə orqanları da operativ tədbirlər görür.
Bəzən belə hadisələrin guya qəsdən təşkil edildiyi iddia olunur. Amma burada hüquq-mühafizə orqanlarının hər hansı rolu və ya məsuliyyəti yoxdur. Taksi sürücülərinin böyük əksəriyyəti imtahan verərək sertifikat alıb və etik davranış qaydaları ilə tanışdır.
Bu məqamda belə bir sual yaranır: əgər sürücülər bu qaydaları bilirlərsə, bu cür halların təkrarlanmasının səbəbi nədir? Bu, artıq narahatedici və təhlükəli tendensiyadır. Son günlərdə də bu xarakterli hadisələrə görə bir neçə sürücü saxlanılıb. Mən hesab edirəm ki, profilaktik tədbirlərin davamlı həyata keçirilməsi və hüquqi məsuliyyətin tətbiqi digər sürücülər üçün də ciddi xəbərdarlıq olacaq.
Burada haqlı olaraq sual yaranır: sürücülər etik davranış qaydalarını bilirlərsə, bu cür halların təkrarlanmasına nə səbəb olur? Artıq söhbət tək-tək hadisələrdən yox, narahatedici və təhlükəli bir tendensiyadan gedir. Son günlərdə də bu tip davranışlara görə bir neçə sürücü saxlanılıb. Hesab edirəm ki, profilaktik tədbirlərin davamlı şəkildə həyata keçirilməsi və hüquqi məsuliyyətin tətbiqi digər sürücülər üçün də ciddi xəbərdarlıq funksiyası daşıyacaq.
Eyni zamanda sərnişinlər tərəfindən təqdim olunan videomateriallar diqqətlə və obyektiv şəkildə araşdırılmalıdır. Bəzi hallarda qadın sərnişinlərin qəsdən müəyyən situasiya yaratdığı və bu səbəbdən sürücünün emosional reaksiya verdiyi iddia olunur. Belə məqamlarda məsələyə birtərəfli deyil, hərtərəfli yanaşmaq vacibdir. Çünki bu cür görüntülərin ictimailəşməsi sürücülərin ictimai nüfuzuna ciddi zərbə vura, onları cəmiyyət qarşısında haqsız yerə ittiham hədəfinə çevirə bilər. Əgər təqdim olunan materiallar qərəzli məqsədlərlə manipulyasiya olunubsa və ortada şər-böhtan faktı varsa, bu, artıq ədalətin kobud şəkildə pozulması deməkdir”.
Aybəniz Səfərova
14:45 25.06.2025
Oxunuş sayı: 10332
