Süni intellektdə yeni dövr: Türk dili modellərinə milyonluq dəstək
Türkiyənin Sənaye və Texnologiya Naziri Mehmet Fatih Kacır, ölkənin süni intellekt sahəsindəki strateji addımlarını sürətləndirmək məqsədilə yeni layihə çağırışını elan edib.
Crossmedia.az xəbər verir ki, bu barədə CNN məlumat verib.
Nazir Kacırın sözlərinə görə, “Milli Süni İntellekt Strategiyası “Türk Dilində Böyük Əsas Dil Modelinin Sektorlar Üzrə Uyğunlaşdırılması Layihəsi” üçün müraciət prosesi başlayıb. Bu layihə ilə sektorlar üzrə uyğunlaşdırılmış türk dilində böyük süni intellekt modellərinin hazırlanması hədəflənir. Hər bir layihə üçün 50 milyon TL-yə qədər qrant dəstəyi veriləcək.(Bu məbləğ Azərbaycan manatı ilə təxminən 9 milyon manat təşkil edir.)
Nazir Kacır X platformasında verdiyi açıqlamada bildirib:
“Milli Texnologiya Hərəkatı ilə kritik texnologiyalarda yerli həllər inkişaf etdirmək əsas hədəfimizdir. Bu çağırış vasitəsilə süni intellektdə türk dilinin təmsil gücünü artıracaq və texnoloji müstəqilliyimizi möhkəmləndirəcək layihələrə dəstək verəcəyik.”
Nazir əlavə edib ki, bu təşəbbüslərlə Türkiyə, süni intellektin formalaşdırdığı yeni rəqəmsal dövrün aparıcı ölkələrindən birinə çevrilməyi hədəfləyir.
Nigar Rəhimova
18:16 16.06.2025
Oxunuş sayı: 11315
