“Son zəng” - unudulmaz xatirələrlə dolu bir gün

Uşaqlıq illərinin ən parlaq səhifələri məktəb həyatı ilə yazılır. İlk hərfləri öyrəndiyimiz, ilk dostluqları qurduğumuz, müəllimlərin qayğısını hiss etdiyimiz illər həyatımızın ən dəyərli çağlarıdır. Məktəb təkcə bilik yeri deyil, həm də böyüməyin, formalaşmağın, xatirələrlə zənginləşməyin məkanıdır.Zaman keçdikcə məktəb illəri arxada qalır, lakin onların izi ömür boyu insanla birgə yaşayır. Hər şagirdin həyatında elə bir an gəlir ki, illərlə səslənən zəng səsi son dəfə eşidilir. Bu, “Son zəng” adlanır. 

Bu gün ölkənin bütün məktəblərində “Son zəng” səsləndi. Hər il olduğu kimi, bu dəfə də məktəb həyətləri musiqi, gülüş, göz yaşları və duyğulu anlarla dolu idi. 11-ci sinif şagirdləri üçün bu gün uşaqlıqla vidalaşma və böyüklər dünyasına açılan bir qapı oldu.

Məktəb həyətinə daxil olan kimi 11-ci sinif şagirdlərinin simasındakı qarışıq hisslər diqqəti cəlb edirdi. Gözlərində həm sevinc, həm də ayrılığın kədəri vardı. Onlar illərlə bir yerdə oxuduqları sinif yoldaşları və sevimli müəllimləri ilə vidalaşırdılar. Bəziləri bu anı fotolarla yaddaşlara həkk etməyə çalışır, bəziləri isə duyğularını gizlətməkdə çətinlik çəkirdi. Müəllimlər bu günü həm qürurla, həm də kövrək bir təbəssümlə qarşıladılar. Onların baxışlarında “artıq böyüdülər” deyən məmnunluqla yanaşı, “bu məktəb onlarsız necə olacaq?” sualının narahatlığı da vardı. Valideynlər də övladlarının böyüyüb yeni həyata qədəm qoyduqlarının şahidi olduqları üçün həm fəxr edir, həm də kövrəlirdilər. Ən maraqlı və simvolik məqamlardan biri də birinci sinif şagirdlərinin çıxışları idi. Əllərində bayraqlar  səhnəyə çıxan bu balacalar gələcəyin məzunları kimi böyük qürurla çıxış etdilər. Onlar məktəb həyatına ilk addımlarını atarkən, məzunların bu həyatdan ayrılmasına şahid oldular.

Bakı şəhəri, Nəsimi rayonunda yerləşən Namiq Məmmədov adına 9 nömrəli məktəbdə təntənəli və duyğusal “Son zəng”

Bu il Namiq Məmmədov adına 9 nömrəli məktəbdə keçirilən “Son zəng” tədbiri də möhtəşəmliyi və duyğusallığı ilə yadda qaldı. Tədbirin təşkilində hər bir detal düşünülmüşdü. Şarlarla, bayraqlarla və fotostendlərlə bəzədilmiş məktəb həyəti əsl bayram əhval-ruhiyyəsi yaradaraq bu günü daha da unudulmaz etdi.

Tədbir milli və xarici rəqslərlə davam etdi. Azərbaycan xalq rəqslərinin ritmi ilə səhnəyə çıxan şagirdlər milli dəyərlərimizi böyük qürurla nümayiş etdirdilər. Daha sonra müxtəlif ölkələrin mədəniyyətlərini əks etdirən xarici rəqslər təqdim olundu. Hər bir çıxış alqışlarla qarşılandı və şagirdlərin həm istedadını, həm də zəhmətini əks etdirdi.

Sinif rəhbərlərinin çıxışları tədbirin ən duyğulu anlarından biri oldu. Onların hər bir sözü illərin zəhmətini, doğmalığı və ayrılığın acısını ifadə edirdi. Nitqlərdə müəllim-məzun münasibətinin dərinliyi və qarşılıqlı hörmət hiss olunurdu.

Birinci sinif şagirdlərinin şeirləri, səhnəcikləri və rəqs nömrələri tədbirə xüsusi rəng qatdı. Balacalar böyük bacı-qardaşlarını sevgi ilə yola saldı, gələcəyin məzunları olaraq onların yerini bir gün dolduracaqlarını simvolik şəkildə göstərdilər.

Və o an gəldi – “Son zəng” səsləndi. Bu səs minlərlə xatirəni, müəllim tövsiyələrini, dost gülüşlərini bir anda canlandırdı. Məzunlar gözlərində yaş, ürəklərində həyəcanla bu səsi dinlədilər. Bu zəng bir dövrü başa vurdu, amma eyni zamanda ümid və məqsədlərlə dolu yeni bir dövrə yol açdı.

Bakı şəhəri, Nizami rayonunda yerləşən 129 nömrəli məktəbdə də “Son zəng”  bayramı coşqu ilə qeyd olundu.

129 nömrəli tam orta məktəbdə də “Son zəng” tədbiri həm məzunlar, həm də məktəb kollektivi üçün yaddaqalan oldu. Məktəbin həyəti bayram ab-havasında idi: səhnə gül-çiçək, şarlar və milli atributlarla bəzədilmiş, məktəbə daxil olan hər kəs üçün xüsusi bir atmosfer yaradılmışdı.

Tədbir dövlət himni ilə başladı və ardınca məktəbin direktoru və müəllimlər məzunlara uğurlar arzuladılar. Onlar çıxışlarında gənclərə inandıqlarını, gələcəkdə cəmiyyətin fəal üzvləri olacaqlarına əmin olduqlarını vurğuladılar.

Bədii hissədə həm milli, həm də xarici rəqslər təqdim olundu. Şagirdlərin musiqili səhnəcikləri, ifa etdikləri şeirlər və maraqlı çıxışları məktəb illərinə nostalji dolu bir baxış idi.

Sinif rəhbərlərinin ürək sözləri isə tədbirə xüsusi duyğu qatdı. Onlar illərlə birlikdə olduqları şagirdlərlə vidalaşmağın çətinliyini hiss etdirir, eyni zamanda gələcək həyatlarında onlara uğurlar diləyirdilər.

Balaca 1-ci sinif şagirdləri isə tədbirin ən şirin hissəsi oldular. Onların sevinc dolu çıxışları və gülərüz rəqsləri bu əlamətdar günü daha da yaddaqalan etdi. Balacalar bir yandan böyük sinif yoldaşlarını yola salır, bir yandan isə öz ilk addımlarını bu məktəb ailəsində atdıqlarını hiss etdirirdilər.

Bakı şəhəri, Yasamal rayonunda yerləşən Akademik Zərifə Əliyeva adına liseydə yüksək səviyyəli “Son zəng” tədbiri

2025-ci ilin “Son zəng” tədbiri Akademik Zərifə Əliyeva adına liseydə də xüsusi təmtəraqla qeyd olundu. Hər zaman tədris nailiyyətləri, mədəni tədbirləri və intizamı ilə seçilən bu nüfuzlu lisey bu dəfə də öz ənənəsinə sadiq qaldı. Məktəbin həyətində təşkil olunan tədbir həm təşkilatçılığı, həm də duyğusal atmosferi ilə yadda qaldı.

Liseyin həyəti bu əlamətdar günə uyğun olaraq bayram ovqatında bəzədilmişdi: milli ornamentli şarlar, foto guşələri, məktəb illərini əks etdirən köhnə şəkillər və xatirə lövhələri məkanın vizual baxımdan da təsirli görünməsini təmin edirdi. Səhər saatlarında başlayan tədbir Azərbaycanın Dövlət Himni ilə açıldı, ardınca liseyin direktoru məzunlara xitab etdi. Onun səmimi və ruhlandırıcı çıxışı valideynlərin və müəllimlərin də qürur dolu baxışlarına səbəb oldu.

Liseyin müəllimləri və sinif rəhbərləri də səhnəyə çıxaraq illərdir yetişdirdikləri şagirdlərə ürək sözlərini söylədilər. Onların sözlərində yalnız vida deyil, həm də ümid və inam vardı. Çünki bu liseydən məzun olan hər bir şagirdin gələcəkdə uğurlu bir yol keçəcəyinə hər kəs inanırdı.

Tədbirin bədii hissəsində şagirdlərin hazırladığı milli və xarici rəqslər, şeir kompozisiyaları, səhnəciklər nümayiş olundu. Azərbaycan mədəniyyətinə dair təqdimatlar, lisey həyatından səhnələr və məzunların çıxışları tədbirə həm gülüş, həm də duyğu qatdı. Balaca 1-ci sinif şagirdləri isə böyük bacı və qardaşlarını özünəməxsus, şirin və səmimi şəkildə yola saldılar. Onların söylədiyi şeirlər və balaca addımlarla yerinə yetirdikləri rəqslər izləyicilər tərəfindən alqışlarla qarşılandı.Məzunlar gözlərində yaş, könüllərində minnətdarlıq və başlarında böyük ümidlərlə bu səslə liseyə vida etdilər.

Hər məktəbdə keçirilən “Son zəng” tədbirləri bir daha göstərdi ki, məktəb təkcə təhsil verilən yer deyil, o, eyni zamanda bir ailə, bir sevgi ocağıdır. Bu gün məktəblə vidalaşan məzunlar sabahın ümidli sabahına doğru inamla addımlayırlar.

Fatimə Nəbiyeva

Fidan Xəlilova