Piyadaların keçid hüququ pozulur - Yol Polisinin xəbərdarlığı
Şəhər küçələrində piyadaların təhlükəsiz hərəkət etməsi üçün nəzərdə tutulmuş keçidlərə çıxışın maneə ilə üzləşməsi narahatlıq doğurur. Sürücülərin yol hərəkəti qaydalarını pozaraq avtomobillərini keçid zolaqlarının üzərində və ya ona yaxın məsafədə saxlaması piyadaların həyatını təhlükəyə atır. Bu isə həm yol hərəkətində nizamsızlığa, həm də bədbəxt hadisələrə səbəb ola bilər.
Mövzu ilə bağlı Crossmedia.az-a açıqlamasında Bakı Şəhər Dövlət Yol Polisi İdarəsinin bölmə rəisi, polis kapitanı Toğrul Nəsirli bildirib ki, piyadaların istifadə etdiyi yolların təhlükəsizliyinin təmin olunması məqsədilə nəzarət tədbirləri mütəmadi olaraq həyata keçirilir.
Lakin bəzi sürücülər dayanma və durma qaydalarını pozaraq piyadaların keçidinə mane olurlar. Onun sözlərinə görə, bu cür hallara yol verən sürücülər İnzibati Xətalar Məcəlləsinin 346-cı maddəsinə əsasən 20 manat məbləğində cərimə edilə bilərlər. Çünki keçid zolağına 5 metrdən yaxın məsafədə avtomobil saxlamaq qadağandır.
Sonda Toğrul Nəsirli həm sürücüləri, həm də piyadaları yol hərəkəti qaydalarına ciddi əməl etməyə çağırıb.
Nihad Tahirov
10:31 04.06.2025
Oxunuş sayı: 4681
