Uşaqlara diqqət, gələcəyə qayğı…
Uşaqlar cəmiyyətin gələcəyi deyil, eyni zamanda onun bu günkü mənəvi göstəricisidir. Onların həyat şəraiti, təhsil imkanları, rifah səviyyəsi bir xalqın nə qədər humanist və ədalətli olduğunu əks etdirir. İyunun 1-də qeyd olunan Beynəlxalq Uşaqlar Günü yalnız bir təqvim hadisəsi deyil, insanlıq borcunun xatırladıldığı simvolik bir gündür. Bu tarix dünyaya səslənir ki, uşaqlara göstərilən münasibət, əslində insanın insana olan münasibətidir.
Azərbaycan bu çağırışa qoşularaq, uşaqların hüquqlarının qorunması və onların hərtərəfli inkişafı üçün ardıcıl siyasət həyata keçirir. BMT-nin Uşaq Hüquqları Konvensiyasına qoşulmaqla ölkəmiz bu sahədə beynəlxalq öhdəliklər götürmüş və bu öhdəlikləri konkret qanunvericilik aktları və institusional mexanizmlərlə təmin etmişdir. “Uşaq hüquqları haqqında” Qanun sadəcə hüquqi sənəd deyil, dövlətin uşağa verdiyi mənəvi dəyərin ifadəsidir.
Müasir dünyada uşaqlar təkcə himayəyə deyil, həm də tanınmağa, dəyərləndirilməyə ehtiyac duyurlar. Onlar düşünən, hiss edən və öz haqlarını dərk edə bilən fərdlərdir. Məhz buna görə də uşaqlara göstərilən qayğı yalnız fiziki və maddi ehtiyacların ödənməsi ilə ölçülməməlidir. Onların yaradıcı potensialının, fərdi azadlıqlarının, sosial bərabərliyinin təmin edilməsi daha dərin və məsuliyyətli yanaşma tələb edir.
Azərbaycanda uşaqların təhsil, sağlamlıq və sosial müdafiə sahəsində hüquqlarının təmin edilməsi məqsədilə genişmiqyaslı dövlət proqramları həyata keçirilir. Xüsusilə aztəminatlı, valideyn himayəsindən məhrum olmuş və fiziki məhdudiyyətli uşaqlara xüsusi diqqət ayrılır. Bu, bir dövlət siyasəti olmaqla yanaşı, həm də cəmiyyətin vicdanıdır.
Təhsildə bərabərlik, uşaqların inkişafına yönəlmiş mədəni tədbirlər və hüquq maarifləndirilməsi – bütün bunlar uşaqların təkcə bu gün deyil, sabah üçün də güclü və mənəvi cəhətdən bütöv fərdlər kimi formalaşmasına xidmət edir. Çünki uşaq dediyimiz varlıq, sabahkı alim, sənətkar, vətəndaş və dövlət qurucusudur. Ona qoyulan hər bir sərmayə əslində gələcəyə atılan möhkəm təməldir.
Bu mənada, Beynəlxalq Uşaqlar Günü bizi sadəcə şən tədbirlər və rəngarəng bayramlarla deyil, daha çox vicdanla düşünməyə vadar edir: Biz uşaqlara necə bir dünya buraxırıq? Onların baxışlarında gələcəyə inam varmı? Əgər bir cəmiyyət uşağın gülüşünü qoruya bilirsə, deməli, o cəmiyyət hələ insanlığını itirməyib.
Ləman Həsənova
12:05 01.06.2025
Oxunuş sayı: 13434
