YAP Yasamal rayon təşkilatında partiya fəalları ilə görüş keçirilib
Yeni Azərbaycan Partiyası (YAP) Yasamal rayon təşkilatında bir qrup partiya fəalı ilə görüş təşkil olunub.
Görüşdə YAP Yasamal rayon təşkilatının sədri Bəxtiyar Nəbiyev, təşkilatın əməkdaşları və partiya fəalları iştirak ediblər.
Çıxışında Bəxtiyar Nəbiyev rəqəmsal platformalarda informasiya savaşının intensivləşdiyi bir dövrdə gənclərin sosial şəbəkələrdə aktiv iştirakının əhəmiyyətini vurğulayıb. Bildirilib ki, gənclərin dövlətçilik mövqeyindən çıxış etməsi, milli maraqların müdafiəsi və Azərbaycan həqiqətlərinin təbliği istiqamətində fəaliyyəti yüksək qiymətləndirilir. Qeyd olunub ki, Ümummilli Lider Heydər Əliyevin siyasi irsi və Prezident İlham Əliyevin rəhbərliyi ilə həyata keçirilən uğurlu siyasət sosial şəbəkələrdə də düzgün və peşəkar şəkildə təqdim edilməlidir.
Görüş zamanı sosial media fəallarına informasiya təhlükəsizliyi, rəqəmsal savadlılıq, dezinformasiyalara qarşı mübarizə və effektiv kommunikasiya üsulları barədə tövsiyələr verilib. Diqqətə çatdırılıb ki, bu gün Azərbaycan gəncləri, xüsusən də sosial şəbəkələrdə dövlətin həyata keçirdiyi siyasətin təbliğində fəallıqları ilə seçilirlər.
Maraqlı diskussiya şəklində keçən görüşdə partiya fəalları ilə fikir mübadiləsi aparılıb, onların sualları cavablandırılıb. Gənclər sosial şəbəkələrdə milli maraqların qorunması və partiyanın ideoloji xəttinin təbliği istiqamətində fəaliyyətlərini daha da gücləndirəcəklərini bildiriblər.
17:35 27.05.2025
Oxunuş sayı: 2503
