Ekspert: "Buğda sortlarının yetişdirilməsi istiqamətində ciddi tədbirlərə ehtiyac var"
Bu ilin yanvar-aprel aylarında Azərbaycan 419 min 105 ton buğda idxal edib.
Dövlət Gömrük Komitəsindən istinadən xəbər verir ki, bu həcmdə buğdanın dəyəri 90 milyon 535 min ABŞ dolları təşkil edib.
Bunlar, ötən ilin eyni dövrü ilə müqayisədə həcm baxımından 152 min 496 ton (57,1 %), dəyər baxımından isə 30 milyon 838 min ABŞ dolları (51,6 %) çoxdur.
Hesabat dövründə buğda idxalına çəkilən xərc Azərbaycanın ümumi idxal xərclərinin 1,1 %-ni təşkil edib.
Dünyada qlobal ərzaq böhranı fonunda strateji məhsulların – xüsusilə də taxılın əhəmiyyəti daha da artıb. Pandemiya, iqlim dəyişiklikləri və silahlı münaqişələr bir çox ölkələri ərzaq təhlükəsizliyi baxımından ciddi sınaqlarla üz-üzə qoyub. Belə bir şəraitdə hər bir dövlət öz daxili ehtiyatlarını gücləndirməyə, ərzaq təminatında dayanıqlılığı təmin etməyə çalışır. Azərbaycan da istisna deyil. Ölkəmizdə taxıla olan illik tələbatın böyük hissəsi hələ də idxal hesabına ödənilir. Bu isə strateji məhsullar üzrə yerli istehsalın artırılmasının zəruriliyini ön plana çıxarır.
Mövzunu Crossmedia.az-a şərh edən iqtisadçı ekspert Natiq Cəfərli bildirib ki, hazırda Azərbaycanda taxıl təminatında əsas yük xarici bazarların üzərindədir. Onun sözlərinə görə, Azərbaycanda yerli taxıl istehsalı daxili tələbatı tam şəkildə qarşılamır: "Hazırda ölkədə istehsal olunan taxıl ümumi ehtiyacımızın cəmi 25-30 faizini ödəyir. Qalan hissə isə idxal olunur. Əvvəllər əsasən Ukraynadan taxıl alırdıq, lakin son illər bu ölkə ilə bağlı yaranmış problemlər səbəbindən daha çox Rusiya və Qazaxıstandan idxal həyata keçirilir. Xüsusilə son dövrlərdə Qazaxıstandan alınan taxılın həcmi artıb".
Ekspert bildirib ki, bu idxal yalnız gündəlik istehlakı deyil, eyni zamanda ölkənin taxıl ehtiyatını da təmin etmək məqsədi daşıyır: "Azərbaycan hökumətinin qərarına əsasən, ölkədə minimum 270 günlük taxıl ehtiyatı saxlanılmalıdır. Bu ehtiyatlarda azalma baş verdikdə, dərhal əlavə taxıl alınır və ehtiyatlar bərpa olunur. Problem ondadır ki, yerli istehsal hələ də kifayət etmir. Yerli keyfiyyətli buğda istehsalının artırılması hədəfi illərdir gündəmdə olsa da, bu istiqamətdə istənilən nəticə əldə olunmayıb. Daim bu sahədə inkişaf və artım hədəfi qoyulsa da, təəssüf ki, hələ də bu məqsədə çatmaq mümkün olmayıb. Yerli istehsalın artırılması və keyfiyyətli buğda sortlarının yetişdirilməsi istiqamətində ciddi tədbirlərə ehtiyac var".
15:10 21.05.2025
Oxunuş sayı: 6142
