Motorola Moto G86 modelinin tam xüsusiyyətləri sızdırıldı
Motorola şirkətinin təqdim etməyə hazırlaşdığı Moto G86 modeli ilə bağlı yeni məlumatlar ortaya çıxıb. Keçən ay sızdırılan görüntülərin doğruluğu bu gün təsdiqlənib və cihazın texniki xüsusiyyətləri tam şəkildə məlum olub.
Crossmedia.az xarici mediaya istinadən xəbər verir ki, Moto G86 modeli giriş səviyyəli Moto G seriyasına aiddir və MediaTek Dimensity 7300 çipseti ilə təchiz olunacaq. Cihaz 8 GB və ya 12 GB RAM, 128 GB və ya 256 GB daxili yaddaş variantları ilə təqdim ediləcək. Həmçinin microSD kart dəstəyi də mövcuddur və bəzi bazarlarda bu kart üçün xüsusi yuva olacaq.
Telefonun arxa panelində üç kamera yerləşəcək. Əsas kamera 50 MP Sony LYT-600 sensoru və optik görüntü sabitləmə (OIS) funksiyası ilə təchiz olunub. İkinci kamera 8 MP ultra-geniş linzalı sadə modul olacaq. Ön kamera isə 32 MP sensorla təchiz ediləcək və ekranın içindəki deşikdə yerləşəcək.
Moto G86 iki fərqli batareya variantı ilə gələcək – 5,200 mAh və ya 6,720 mAh. Məlumata görə, Avropa bazarı daha kiçik batareyalı, lakin daha qalın gövdəli modeli qəbul edəcək. Bu fərq müxtəlif regionlarda tətbiq olunan texniki test və sertifikat tələblərindən qaynaqlanır. Avropa İttifaqı IEC (Beynəlxalq Elektrotexniki Komissiya) standartlarına uyğun ardıcıl testlər tələb etdiyi üçün, Motorola modeli bazara tez çıxarmaq məqsədilə bu fərqli yanaşmanı seçib.
Moto G86 modelinin yalnız EMEA (Avropa, Yaxın Şərq və Afrika) regionunda 4 il müddətində iki ayda bir proqram yeniləmələri alacağı bildirilir. Bu qərar Avropa İttifaqının hüquqi tələbləri ilə bağlıdır.
Qeyd edək ki, Moto G86 modelinin sızdırılması Moto G56 modelinə dair oxşar məlumatların üzə çıxmasından bir neçə saat sonra baş verib. Motorola-nın yaxın günlərdə hər iki modeli rəsmi şəkildə təqdim edəcəyi gözlənilir.
Zeynəb Yunuszadə
14:30 07.05.2025
Oxunuş sayı: 12434
