Google-un “AI Rejimi” ABŞ-də bütün istifadəçilər üçün əlçatan oldu
Google-un mart ayında sınaq məqsədilə istifadəyə verdiyi “AI Rejimi” funksiyası artıq ABŞ-dəki bütün Google Labs istifadəçiləri üçün aktivləşdirilib. Əvvəllər yalnız gözləmə siyahısı vasitəsilə əldə edilə bilən bu xüsusiyyət, indi Labs bölməsinə daxil olan hər kəs üçün mövcuddur.
Crossmedia.az xarici mediaya istinadən xəbər verir ki, şirkətin verdiyi açıqlamaya görə, yaxın həftələrdə ABŞ-də olan istifadəçilərin kiçik bir hissəsi “AI Rejimi” tabını birbaşa Google Axtarışda görə biləcək. Bunun üçün Labs bölməsinə keçməyə ehtiyac qalmayacaq.
AI Rejimi axtarışı söhbət formatına çevirərək chatbot təcrübəsi təqdim edir. Yeni funksiyaların tərkibinə yer və məhsul kartları da daxildir. İstifadəçilər restoranlar, salonlar və mağazalar haqqında reytinqlər, rəylər və iş saatları kimi məlumatlara, məhsullar üçün isə qiymət, şəkil, çatdırılma və yerli anbar məlumatlarına real vaxtda baxa biləcəklər.
Masaüstü versiyada AI Rejiminə sol panel də əlavə olunub. Bu paneldə istifadəçilər keçmiş axtarışlarına baxa, əvvəlki mövzulara geri dönə və əlavə suallar verə biləcəklər.
Google-un bu yeniliyi axtarış təcrübəsini daha interaktiv və fərdiləşdirilmiş hala gətirməyi hədəfləyir.
Zeynəb Yunuszadə
02:00 03.05.2025
Oxunuş sayı: 7934
