Avtomobil sektorunda “generatorlu” modellərə maraq artır
Çində keçirilən Şanxay Avtomobil Sərgisi, avtomobil sənayesində dəyişən trendləri ortaya qoydu.
Sərgidə tam elektrikli modellərlə tanınan markalar bu dəfə benzin mühərriki ilə batareyanı dolduran yeni nəsil hibrid texnologiyalarını (E-REV) təqdim etdilər. Əsasən premium seqmentdə yer alan bu modellər, gələcəkdə digər bazarlarda da yayıla bilər.
Crossmedia.az xarici mediaya istinadən bildirir ki, Şanxayda Zeekr 9X, Jetour G900 və F700 kimi uzun mənzilli hibrid modellər diqqət çəkdi. Bu avtomobillərdə benzin mühərriki yalnız batareyanı doldurmaq üçün istifadə olunur. BYD-nin Yangwang U8L modeli də sərgidə tanıdılan digər E-REV texnologiyalı avtomobillərdən biri oldu.
Çin Avtomobil İstehsalçıları Assosiasiyasının məlumatına görə, 2024-cü ildə Çində E-REV və plug-in hibrid satışları tam elektrikli avtomobillərdən daha sürətli artıb. Hibrid modellərə artan maraq, ənənəvi istehsalçıların da məhsul çeşidlərini genişləndirməsinə səbəb olub.
Volkswagen və Mercedes-Benz kimi Alman istehsalçıları Çində hibrid modellərə daha çox yönəlməyə başlayıb. Tesla isə hibridləri keçid texnologiyası kimi qiymətləndirir və bu sahəyə yönəlməkdən imtina edir.
Türkiyədə isə Nissan-ın e-POWER texnologiyası ilə başlayan hibrid marağı artmaqdadır. ODMD-nin məlumatına görə, 2025-ci ilin ilk üç ayında Türkiyə avtomobil bazarında hibridlərin payı 29%-ə yüksəlib, plug-in hibridlərin payı isə 4.2%-ə çatıb.
Fatimə Nəbiyeva
12:34 28.04.2025
Oxunuş sayı: 11876
