Əsrin böhtanı: 1915-ci il soyqırımı iddialarının arxasındakı həqiqətlər
Türkiyənin nüfuzuna beynəlxalq arenada zərbə vurmaq məqsədilə 1915-ci il hadisələrinin guya “erməni soyqırımı” kimi təqdim edilməsi ermənilər tərəfindən davamlı şəkildə gündəmdə saxlanılır.
Crossmedia.az bildirir ki, bu barədə Sabah qəzetində “Əsrin böhtanı – soyqırımı yalanı” sərlövhəli məqalədə qeyd olunur.
Məqalənin müəllifi Harun Sekmen Osmanlı ordusunun arxa cəbhəsində əhalini terrora məruz qoyan erməni silahlı dəstələrinin vəhşilikləri barədə saysız-hesabsız arxiv sənədlərinin mövcud olduğunu vurğulayır. Bildirilir ki, ermənilərin Anadolunun müsəlman əhalisinə qarşı törətdikləri vəhşiliklər tarixdə nadir hallarda rast gəlinəcək səviyyədə olub.
“Soyqırımı iddialarının arxasında heç bir sübut yoxdur. Əksinə, arxiv sənədləri sübut edir ki, 1905-1920-ci illər arasında daşnak və “Hnçak” dəstələri Anadoluda 529.395 türkü qətlə yetirib”, – deyə müəllif bildirir.
Həmçinin yazıda qeyd olunur ki, 1821-1922-ci illər arasında Qərb dövlətlərinin həyata keçirdiyi siyasət nəticəsində milyonlarla türk öldürülüb, təxminən 5.5 milyon insan isə Osmanlı dövlətinin nəzarətində olmuş Avropa ərazilərindən qovulub.
Tarix professoru Nəciməddin Alkanın fikirlərinə də yer verilən yazıda o, vurğulayır ki, hər bir dövlət öz müstəqilliyini və ərazi bütövlüyünü qorumaq üçün üsyanları yatırmaq hüququna malikdir.
“Ermənilərin Osmanlı dövlətinin digər bölgələrinə köçürülməsi qərarı da məhz bu məqsədlə verilib. Əks halda, bu gün Şərqi Anadolu bölgəsində vəziyyət tamam başqa olardı”, – deyə professor Alkan bildirib.
Tarixçi əlavə edir ki, Anadoludakı ermənilər arasında separatist meyllər 1880-ci illərin ortalarından etibarən sürətlə yayılmağa başlayıb. 1890-cı illərdən isə həm İstanbulda, həm də Şərqi Anadoluda ermənilər tərəfindən diversiya və terror aktları həyata keçirilib. Bu fəaliyyətlərə qarşı tədbirlərin görülməsi isə Osmanlı dövlətinin təbii haqqı kimi qiymətləndirilir.
Fidan Xəlilova
16:11 24.04.2025
Oxunuş sayı: 9930
