Ekspert zəlzələ zamanı yayımı dayandırmayan aparıcıdan danışdı: "İnsanlar belə məqamlarda jurnalistə sığınır"
Jurnalistlərə verilən əsas tələblərdən biri də soyuqqanlı olmaq, ekstremal vəziyyətlərdə peşəkarcasına davrana bilməkdir. Aprelin 23-də İstanbulda 6.2 ballıq zəlzələ baş verdiyi hər öz işi il məşğul idi. Təbii fəlakət hər kəsi qəfil yaxaladı. Belələrindən biri də CNN Türk-ün aparıcı Meltem Bozbeyoğlu idi. O, adəti üzrə canlı yayımda həmsöhbəti ilə müzakirə edirdi. Qəfil hiss edilən silkələnmə ilə jurnalist həyəcanlansa da, özünü itirmədi və hadisə barədə tamaaçılara məlumat verdi. Bəlkə də, çoxları zəlzələ barədə informasiyanı ondan aldılar.
Bu hadisə konflikt hallarında jurnalistlərin davranış qaydalarını bir daha gündəmə gətirdi.
Bakı Dövlət Universitetinin Jurnalistika fakültəsinin müəllimi, konflikt jurnalistika mütəxəssisi Əlisəfa Mehdi bu barədə Crossmedia.az -a açıqlama verib.
O, bu cür hallarda psixoloji hazırlığın əhəmiyyətinə diqqət çəkib: “İnsanlar istənilən vəziyyətdə necə danışmalı və necə davranmalı olduqlarını bilməlidirlər. Qorxu insanda instinktiv haldır. Lakin nəticələri qabaqcadan analiz edə bilən insan panikaya düşmür, həyəcan keçirmir və özünü itirmir. Jurnalistikada "strinqer" termini var. Strinqerlər müharibə, zəlzələ və digər ekstremal hallarda hadisənin mərkəzindən ən dəqiq və operativ məlumatı ötürən jurnalistlərdir. Belə insanlar yüksək psixoloji dayanıqlığa, məsuliyyət hissinə və informasiya təhlilinə malik olurlar. Aparıcının davranışı bu xarakterə uyğun gəlirsə, təqdirəlayiqdir”.
Ə. Mehdi qeyd edib ki, media nümayəndələrinin bu cür davranışları yalnız peşə məsuliyyəti deyil, eyni zamanda cəmiyyət üçün nümunə ola biləcək duruşdur: “Canlı yayımda təmkin nümayiş etdirmək sadəcə efiri idarə etmək deyil, izləyiciyə güvən və sabitlik ötürməkdir. İnsanlar belə məqamlarda jurnalistə sığınır. Aparıcı bu inamı qoruya bilirsə, artıq o, sadəcə xəbər vermir – o, cəmiyyətin dirəniş nöqtəsinə çevrilir”.
Jurnalist belə vəziyyətlərdə jurnalistlərə psixoloji təlimlərin keçirilməsini də zəruri sayır. Onun fikrincə, fövqəladə vəziyyətlərə hazırlıq həm fiziki, həm də emosional baxımdan aparılmalıdır.
Zəhra Ağayeva
15:48 24.04.2025
Oxunuş sayı: 1074
