Azərbaycanda dəhşətli zəlzələ olacaq?: "Bu gecə iyirmidən çox təkan olub" - Baş seysmoloq
Son günlərdə Türkiyənin müxtəlif bölgələrində baş verən zəlzələlər bölgədə seysmik fəallığın artması ilə bağlı suallar doğurub. Türkiyədə sonuncu dəfə aprelin 23-də Türkiyənin İstanbul şəhəri yaxınlığında, Mərmərə dənizinin Silivri sahillərində 6,2 bal gücündə zəlzələ baş verib. Yeraltı təkanlar təxminən 6,9 kilometr dərinlikdə qeydə alınıb. Zəlzələdən sonra bölgədə 100-dən çox afterşok müşahidə olunub. Məsələ ilə bağlı yerli mütəxəssislər bildirirlər ki, Azərbaycanın yerləşdiyi seysmik zonalar və Türkiyə ilə geoloji bağlılıq nəzərə alınaraq, ehtiyatlı olmaq vacibdir. Seysmoloqlar bu cür hadisələrin qonşu ölkələrə təsir imkanlarını qiymətləndirir və mümkün riskləri istisna etmirlər.
AMEA nəzdində Respublika Seysmoloji Xidmət Mərkəzinin baş direktoru Qurban Yetirmişli Türkiyədə baş verən zəlzələlər fonunda Azərbaycandakı seysmik vəziyyətlə bağlı Crossmedia.az-a açıqlama verib.
Onun sözlərinə görə, Azərbaycanda hər gün müxtəlif gücdə yeraltı təkanlar qeydə alınır: "Bu, ölkədə geodinamik proseslərin daim aktiv olması ilə əlaqədardır. Azərbaycanda hər gün yeraltı təkanlar olur. Çünki geodinamik proseslər aktivdir, bloklar daim hərəkətdədir. Məsələn, bu gecə iyirmidən çox təkan baş verib, lakin heç biri hiss edilməyib. Öncəki gün isə axşam saat 9-dan səhərə kimi 37 təkan qeydə alınıb.”
O qeyd edib ki, ölkədə seysmik vəziyyət fon səviyyəsindədir və güclü, dağıdıcı zəlzələ riski yoxdur:
“Elə bir zəlzələ ocağı yoxdur ki, geniş bölgələri əhatə edəcək dərəcədə güclü aktivlik olsun və fəlakətli nəticələr versin. Belə zəlzələlərin baş verməsi ehtimalı demək olar ki, mövcud deyil.”
Q. Yetirmişli əlavə edib ki, bəzi təkanlar hiss olunsa da, bu, təbii və qorxulu olmayan haldır:
“İçərilərində üç, dörd bal gücündə hiss olunanlar olur, amma bu narahatlıq doğurmalı deyil. Xırda zəlzələlərin olması normaldır.
Seysmoloq Türkiyədə baş verən zəlzələlərin Azərbaycana təsir edib-etməyəcəyi məsələsinə də aydınlıq gətirib. O bildirib ki, bu ehtimal da yoxdur: "Türkiyədə afterşoklar davam edir. Dünəndən bu günə qədər orada təxminən altmışa yaxın təkan baş verib. Bu gecə isə on səkkiz xırda təkan qeydə alınıb. Hazırda orada enerji boşalması prosesi gedir və mən hesab edirəm ki, altı baldan güclü zəlzələ ehtimalı yoxdur. Bu afterşoklar bir müddət davam edəcək, lakin təhlükəli vəziyyət yaranmayacaq. Magnituda dörd, dörd yarım olan təkanlar müşahidə olunur. Biz bu təkanların hamısını qeydiyyata alırıq. Orada da vəziyyət sabitləşənə qədər bu xırda enerji boşalmaları davam edəcək. Amma ümumilikdə, qorxulu heç nə yoxdur".
Fatimə Nəbiyeva
14:52 24.04.2025
Oxunuş sayı: 1384
