Azərbaycanda Enerji Effektivliyi Fondu yaradılır - Alternativ enerji üçün yeni mərhələ
Son illərdə dünyada alternativ və bərpa olunan enerji mənbələrinə keçid sürətlənməkdədir. Enerji itkilərinin azaldılması, resurslardan səmərəli istifadə və ekoloji balansın qorunması bütün ölkələr üçün prioritet məsələyə çevrilib. Bu kontekstdə Azərbaycanda Enerji Effektivliyi Fondunun yaradılması da əlamətdar hadisə hesab oluna bilər.
Mövzu ilə bağlı iqtisadçı ekspert Natiq Cəfərli Crossmedia.az saytına açıqlamasında bu fondun yaradılmasının əhəmiyyətini belə dəyərləndirib:
“Dünyada bir trend var son vaxtlar – hamı alternativ enerjiyə keçir. Əldə olunan enerji resurslarından daha qənaətli və effektiv istifadə etmək kimi mövzular hazırda həm populyar, həm də zəruri məsələlərdir. Enerji itkilərinə kifayət qədər ciddi yol verilir dünyanın bir çox ölkələrində və bununla mübarizə aparılması nəzərdə tutulur.
Bu nöqteyi-nəzərdən belə bir fondun yaradılması Azərbaycanın alternativ və bərpa olunan enerjidən istifadə potensialının açılmasında mühüm rol oynaya bilər. Bununla yanaşı, ənənəvi üsullarla əldə olunan enerjinin daha qənaətlə və məqsədəuyğun israf olunmaması üçün də yol xəritələrinin hazırlanması, yeni texnologiyaların tətbiqi kimi ciddi məsələlərlə məşğul olacaq.”
Enerji Effektivliyi Fondunun fəaliyyəti nəticəsində həm enerji sərfiyyatının azaldılması, həm də innovativ texnologiyaların tətbiqi ilə ölkədə enerji sektorunun inkişafına təkan veriləcəyi gözlənilir.
Toğrul Əhmədzadə
17:23 23.04.2025
Oxunuş sayı: 10417
