Ermənilərin saxta soyqırım iddiası necə yarandı? - Tarixçi açıqladı
Hər ilin 24 aprel tarixində ermənilər tərəfindən "erməni soyqırımı" adlandırılan hadisənin guya Osmanlı İmperiyası tərəfindən həyata keçirildiyi iddiaları ilə bağlı anım mərasimləri təşkil olunur. Bu iddiaları əsas tutaraq erməni diasporu və lobbi təşkilatları dünyanın müxtəlif ölkələrində saxta sənədlər və manipulyativ arqumentlərlə təbliğat və təşviqat kampaniyaları aparırlar. Təəssüf doğuran məqam isə ondan ibarətdir ki, mövcud tarixi sənədlər və faktlar bu iddiaların əsassız olduğunu sübut etməsinə baxmayaraq, bir sıra dövlətlər bu hadisəni "soyqırımı" kimi tanıyıblar. Bəs nədir bu saxta soyqırım? Niyə məhz 24 aprel seçildi?
Mövzu ilə bağlı tarix üzrə fəlsəfə doktoru Taleh Cəfərov Crossmedia.az-a açıqlama verib: "l Dünya müharibəsinin başlanmasından az sonra Şərqi və Cənub-Şərqi Anadolu bölgələrindən gələn sarsıdıcı xəbərlər, o cümlədən rus qoşunlarının sərhəddə yaxınlaşaraq burada erməni millətçiləri ilə birgə türk müsəlman əhalisini qətlə yetirməsi Ali Baş Komandan vəkili Ənvər Paşanı radikal addımlar atmağa məcbur etdi.
O zaman Van vilayətində erməni komitəçiləri və rus silahlı birləşmələri tərəfindən misli görünməmiş vəhşiliklər törədilmişdi. Osmanlı hökuməti erməni cəlladlarının türklərə qarşı soyqırımı siyasətinin qarşısını almaq məqsədilə önləyici addımlar atmaq məcburiyyətində qaldı.
İlk növbədə 1915-ci il aprelin 24-də DİN-nin sərəncamı ilə İstanbul və digər böyük şəhərlərdə erməni təşkilatları dərhal bağlanmalı, terrorçu təşkilatların başçıları isə həbs edilməli idi. Bu sərəncam əsasında 2345 nəfər həbs edildi. O dövrün şahidlərinin verdiyi ifadələrə əsasən 600 nəfər erməni yazıçısı, şairi, jurnalisti, siyasətçisi, həkimi, vəkili, hüquqşünası, müəllimi, alimi və ruhanisi həbs edildi.
Məhz 24 aprel günündə erməni hərəkatına rəhbərlik edən bu peşə sahiblərinin həbs edilməsi erməni millətçilərini bərk narahat edirdi. Çünki bu şəxslərin uzun müddət həbsdə saxlanılması "erməni məsələsi"ni öz istiqamətini itirməsi və bununla da erməni hərəkatının əsas hərəkətverici "beyinlər"inin zərərsizləşdirilməsi ilə nəticələnə bilərdi. Odur ki, həmin tarixdən etibarən ermənilər aprelin 24-nü soyqırımı günü kimi qeyd edirlər".
Ayhan Ağarzayev
15:00 23.04.2025
Oxunuş sayı: 15114
