Gənc mühəndislər sadə dronla böyük uğura imza atdı: 4,3 milyon dollarlıq investisiya topladılar
2024-cü ilin 18 fevralında Ian Laffey adlı gənc mühəndis X platformasında paylaşdığı postla texnologiya dünyasının diqqətini çəkdi. O, yeni tanış olduğu Sacha Lévy və Carl Schoeller ilə birlikdə bir hackathon zamanı ucuz başa gələn və yalnız kamerası ilə Google Maps istifadə edərək koordinat təyin edə bilən bir dron hazırladıqlarını bildirdi.
Crossmedia.az xarici mediaya istinadən xəbər verir ki, mühəndislərin hazırladığı bu texnologiya, xüsusilə Ukraynada dronların GPS siqnalının qarışdırılması probleminə qarşı effektiv bir həll kimi dəyərləndirildi. Hazırda GPS siqnalları bloklandığı üçün dron operatorları yüksək texnologiyalı eynəklərlə görmə əsasında idarəetməyə məcbur qalır ki, bu da xüsusilə dumanlı və gecə şəraitində ciddi problemlərə səbəb olur.
Hackathon-un sonunda yolları ayrılan komanda üzvləri bir gün sonra Y Combinator startap sürətləndirici proqramına müraciət etməyə qərar verdilər və 2024-cü ilin yaz proqramına qəbul edildilər.
Hazırda onların San-Fransiskoda fəaliyyət göstərən startapı — Theseus, First Round Capital-ın rəhbərliyi ilə keçirilən ilkin investisiya mərhələsində 4,3 milyon dollar vəsait toplayıb. Layihəyə əlavə olaraq Y Combinator və Lux Capital da maliyyə dəstəyi verib. Şirkət bu uğurunu eksklüziv olaraq TechCrunch-a açıqlayıb.
Zeynəb Yunuszadə
17:31 19.04.2025
Oxunuş sayı: 9475
