Taobao ABŞ-də sürətlə populyarlaşır
Çin mənşəli onlayn alış-veriş platforması Taobao, ABŞ-də sürətlə məşhurlaşaraq Apple App Store-da pulsuz iPhone tətbiqləri arasında beşinci yerə yüksəlib. Maraqlıdır ki, bu yüksəliş ABŞ-nin Çin mallarına qarşı tətbiq etdiyi tariflərə baxmayaraq baş verib.
Crossmedia.az xarici mediaya istinadən xəbər verir ki, son günlərdə TikTok sosial şəbəkəsində yayılan videolarda Çin istehsalçıları bir çox lüks brendlərin – geyim, çanta, ayaqqabı və aksesuarların – əslində Çində istehsal olunduğunu, lakin daha sonra İtaliya və Fransa kimi ölkələrə göndərilərək orada brend etiketləri ilə yenidən qablaşdırıldığını izah ediblər. Bu açıqlamalardan sonra ABŞ-li istifadəçilər Çin mənşəli alış-veriş tətbiqlərinə daha çox maraq göstərməyə başlayıblar.
Yeni statistik məlumatlara əsasən, 2024-cü ilin aprel ayında Taobao-nun ABŞ-dəki yükləmə sayı 185,000-ə çatıb. Bu göstərici ötən ilin eyni dövründə qeydə alınan 30,000 yükləmə ilə müqayisədə 514 faiz artım deməkdir. Bu məlumatlar tətbiqlərin analizini aparan Appfigures şirkəti tərəfindən təqdim olunub.
Mütəxəssislər hesab edirlər ki, bu artım həm də ABŞ istifadəçilərinin orijinal məhsulların istehsal mənşəyi barədə daha çox məlumatlı olmağa başlaması ilə əlaqədardır. Taobao-nun bu yüksəlişi gələcəkdə Çin platformalarının ABŞ bazarında daha geniş yer tutacağına işarə edə bilər.
Zeynəb Yunuszadə
17:17 19.04.2025
Oxunuş sayı: 755
