OpenAI yeni sosial media platforması üzərində işləyir
OpenAI-nin sosial axın xüsusiyyətinə malik yeni sosial media platforması üzərində iş apardığı bildirilir. “The Verge”nəşrinin bir neçə mənbəyə istinadən yaydığı məlumata görə, layihə hələ ilkin mərhələdə olsa da, şirkətin baş direktoru Sem Altmanın bu platforma ilə bağlı xarici ekspertlərin fikirlərini topladığı qeyd olunub.
Crossmedia.az xəbər verir ki, yeni platformanın ChatGPT-yə inteqrasiya olunacağı, yoxsa müstəqil bir tətbiq kimi təqdim ediləcəyi hələlik məlum deyil. Lakin ChatGPT-nin ötən ay dünyanın ən çox endirilən tətbiqi olması bu platformaya marağı daha da artırıb.
Analitiklər bu addımın Sem Altman ilə X platformasının sahibi İlon Mask arasındakı rəqabəti daha da gücləndirəcəyini hesab edirlər. Xatırladaq ki, Mask bu ilin fevralında OpenAI-ni 97,4 milyard dollara almaq üçün təklif vermiş, Altman isə bu təklifə “Xeyr, təşəkkürlər, amma istəsəniz biz Twitter-i 9,74 milyard dollara ala bilərik” cavabını vermişdi.
OpenAI-nin sosial media sahəsinə daxil olması, eyni zamanda Meta ilə rəqabəti də dərinləşdirə bilər. Bildirilir ki, Meta da öz süni intellekt köməkçisi üçün sosial axın xüsusiyyətli müstəqil tətbiq hazırlayır. Əgər OpenAI-nin layihəsi gerçəkləşərsə, şirkət bu yolla X və Meta kimi platformaların malik olduğu real vaxt məlumatlarına birbaşa çıxış əldə edəcək və bu da süni intellekt modellərinin təlimi baxımından mühüm üstünlük təmin edəcək.
Mədinə Cəlilova
22:21 16.04.2025
Oxunuş sayı: 1453
