Google Gemini üçün Photos inteqrasiyası istifadəyə verildi
Süni intellekt köməkçisi Gemini artıq Calendar, Drive, Docs, Maps, YouTube və digər Google tətbiqləri ilə inteqrasiya olunur. Android versiyası isə həmçinin Spotify, OpenStax, WhatsApp və Photos ilə də işləyə bilir.
Crossmedia.az xarici mediaya istinadən xəbər verir ki, tətbiqin yeni versiyası ötən ay təqdim olunmuşdu və 9to5Google-un məlumatına görə, artıq bu versiya cihazlara çatmağa başlayıb.
Yeniləməyə iki yeni funksionallıq əlavə edilib: birincisi, Gemini-nin Google Photos-da saxlanılan şəkilləri nəzərdən keçirməsinə imkan verir. Bu funksional üzlər, məkanlar və tarixlərə görə axtarış etməyə şərait yaradır. Bundan əlavə, istifadəçiyə konkret sorğular üçün cavab yönümlü təkliflər təqdim olunur — məsələn, “son selfiləri göstər” və ya “landşaft fotolarını tap”.
İkinci funksiya isə daha geniş məlumat bazasına əsaslanır və belə sualları cavablandırmağa yönəlib: “Lissabonda harada vegan yeməyi yemişdim?” və ya “Bergamoda gördüyüm Ferrari-nin nömrə nişanı nə idi?” Nəticəyə toxunduqda Google Photos tətbiqi açılır və daha ətraflı məlumat üçün “Daha çox göstər” düyməsi təqdim olunur.
Google Photos funksiyasını Android üçün Gemini tətbiqində aktivləşdirmək mümkündür. Bunun üçün yuxarı sağ küncdə yerləşən Profil menyusuna daxil olun, “Tətbiqlər” bölməsini seçin, sonra isə “Media” bölməsinə qədər sürüşdürərək Google Photos-u aktiv edin. Bu seçim Spotify və YouTube-un yanında yerləşməlidir. Funksional hələ ki mərhələli şəkildə təqdim olunur və hazırda yalnız ABŞ-də əlçatandır.
Zeynəb Yunuszadə
21:00 15.04.2025
Oxunuş sayı: 1236
