Apple bir günlük fasilədən sonra yenidən lider oldu
Çərşənbə axşamı “dünyanın ən dəyərli şirkəti” statusunu Microsoft-a itirən Apple, çərşənbə günü səhmlərinin 15,33 faiz artması ilə birinciliyi yenidən ələ keçirib. Şirkətin bazar dəyəri 2,987 trilyon dollara çataraq son 27 ilin ən böyük gündəlik artımını qeyd edib.
Crossmedia.az xarici mediaya istinadən bildirir ki, ABŞ Prezidenti Donald Trampın Çin istisna olmaqla digər ölkələrə tətbiq edilən əlavə gömrük rüsumlarını 90 gün müddətinə təxirə salması ABŞ fond bazarlarında tarixi bir gün yaşadıb. Texnoloji şirkətlərin daxil olduğu Nasdaq Composite indeksi 2001-ci ilin yanvarından bəri ən yüksək gündəlik artım olan 12,16 faizlə yadda qalıb.
Ən nəzərəçarpacaq yüksəlişlərdən biri tariflərdən ən çox təsirlənən şirkətlərdən biri olan Apple-da qeydə alınıb. Şirkətin səhmləri bir gündə 15,33 faiz artıb. Bu, 1998-ci ilin yanvarından bəri Apple-ın səhmlərində ən sürətli gündəlik artım olub.
Bu artımla Apple, bir gün əvvəl Microsoft-a itirdiyi liderlik mövqeyini tez bir zamanda geri alıb. Microsoft-un səhmləri gündəlik 10,13 faiz bahalaşsa da, şirkətin bazar dəyəri 2,902 trilyon dollar səviyyəsində qalıb və Apple-ın 2,987 trilyon dollarından geri qalıb.
Fatimə Nəbiyeva
12:38 10.04.2025
Oxunuş sayı: 7851
