SOS: Azərbaycanda demoqrafik vəziyyət getdikcə pisləşir
Milli Məclisin Əmək və sosial siyasət komitəsinin sədri Musa Quliyev komitənin bugünkü iclasında “Əmək pensiyaları haqqında” qanuna təklif edilən dəyişikliklərin müzakirəsi zamanı deyib ki, demoqrafiq artımla əlaqəli dövlət proqramının qəbul olunması müzakirə edilməli və bununla bağlı hökumətə təkliflər verilməlidir.
O qeyd edib ki, çoxuşaqlı ailə anlayışına da baxılması vacibdir.
Komitə sədri xatırladıb ki, çoxuşaqlı ailələr haqqında məsələ həm komitədə, həm Milli Məclisdə, həm də ictimaiyyət arasında tez-tez müzakirə mövzusu olur:
"Azərbaycanda doğum və ölüm nisbəti getdikcə bir-birinə yaxınlaşır. İnsanların təbii artım tempi aşağı düşüb. 10-12 il əvvəl ölkədə ildə 150-160 min körpə doğulurdusa, indi onların sayı təxminən 100-100 min nəfərə enib. Hesab edirəm ki, bu tendensiya davam edəcək. Çoxuşaqlı ailə anlayışı üçün 5 və daha çox uşağı olan ailələrdən uşaq sayını azaltmaq olar".
Bu barədə Crossmedia.az-a danışan iqtisadçı - ekspert Natiq Cəfərli bildirib ki, Azərbaycanda demoqrafik vəziyyət, doğrudan da, son illərdə pisləşməyə doğru gedir: "Bu baxımdan vəziyyət tam mənada qənaətbəxş olmasa da, hələ də Cənubi Qafqaz regionu üzrə ən yaxşı göstəricilər Azərbaycana aiddir. Lakin ümumi tendensiyanın mənfi istiqamətdə olması narahatlıq doğurur".
Onun sözlərinə görə, demoqrafik vəziyyətin yaxşılaşdırılması üçün müəyyən islahatlara və praktiki addımlara ehtiyac var:
"Ölkənin əhali sayı iqtisadi göstəricilərə birbaşa təsir edir. Əhali sayının artması daxili istehlakın çoxalmasına və nəticə etibarilə iqtisadiyyatın stimullaşdırılmasına səbəb olur. Bu isə iqtisadi məsələlər baxımından az əhəmiyyətli amil deyil. İqtisadi və sosial sahədə stimullaşdırıcı addımların atılması həm də demoqrafik inkişaf üçün əlavə imkanlar yarada bilər. Bu baxımdan sosial yardım layihələrinin genişləndirilməsi, dövlət tərəfindən vətəndaşların mənzil təminatının yaxşılaşdırılması, uşaq pulunun verilməsi və digər bu tip təşəbbüslər vacib sayılır".
Aydan Quliyeva
16:37 07.04.2025
Oxunuş sayı: 17761
