"Bakı şəhərində mənzil-tikinti idarələri bunlara əməl etmirlər" - Ramil Qasımzadə
Evlərin planlamaya uyğun olaraq sökülməsi hallarında verilən kompensasiyalar, əsasən mülkiyyət hüququ və dövlətin urbanistik siyasəti ilə əlaqəlidir. Bu tip hallar, şəhərsalma layihələrinə uyğun olaraq, bəzən şəhərin infrastrukturunun inkişaf etdirilməsi, yeni yolların çəkilməsi, ya da digər şəhərsalma məqsədləri üçün mövcud binaların sökülməsini tələb edə bilər. Azərbaycan Respublikasında belə hallarda mülkiyyətçilərə ödənilən kompensasiyalar müəyyən qanunvericilik və prosedurlara əsaslanır.
Bu fikirləri Crossmedia.az-a açıqlamasında, əmlak eksperti Ramil Qasımzadə bildirib.
Ekspert deyib ki, evlər müxtəlif məqsədlər üçün sökülə bilər. Birincisi, infrastruktur layihələrinin icrası ilə bağlı olaraq, dövlət layihələri aid edilir. Sökülən evlərin yerinə, hansısa iaşə obyektləri, dövlət əhəmiyyətli mərkəzlər tikilə bilər. İkincisi, biznes-kommersiya məqsədli olaraq, hansısa MMC-lər və ya mənzil-tikinti korporativləri tərəfindən çoxmənzilli binaların , qeyri-yaşayış sahələrinin inşası ilə bağlı, sökülənlər də aiddir. Qanun göstərir ki, hər bir evi sökülən sakinlərin evləri müstəqil qiymətləndirici tərəfindən qiymətləndirilir. Yəni, onlara bazar dəyərinə uyğun olaraq, kompensasiya hesablanır.
Ekspert açıqlayıb ki, “ Qiymətləndirmə haqqında” qanuna əsasən, qeydiyyatdan keçmiş qiymətləndiricilər tərəfindən həyata keçirilir. Bundan sonra, kompensasiyanın məbləği qeyd edilir və sifarişçi tərəfə verilir. Sifarişçi tərəf vətəndaşlar ilə danışıqlar aparır. Razılıq əldə edildikdən sonra, kompensasiya ödənilir və evlərin söküntüsünə başlanılır.
Ramil Qasımzadə vurğulayıb ki, təəssüf ki, ölkədə, xüsusilə də, Bakı şəhərində mənzil-tikinti idarələri buna əməl etmir. Birbaşa olaraq, vətəndaşlarla danışıq aparılır. Sonda standart qiymət müəyyən edilir. Razı olmayan vətəndaşlarla isə, mübahisələr məhkəmələrə qədər gedib çıxır. Məhkəmələr yüksək qiymətləndiricini dəvət edir. Sonra isə, bazar qiymətinə uyğun olaraq, əmlakın qiyməti müəyyən edilir. Tərəflər də xəbərdar olduqları andan etibarən, proses müəyyən qaydada həyata keçirilir. Razı olmadıqda, məhkəmə qaydası ilə əmlak ya sökülür, ya da tikinti dayandırılır. Bu da vətəndaşın məcburi, ərazidən çıxarılması ilə sonlanır.
Həbib Qasımov
17:18 05.04.2025
Oxunuş sayı: 7879
