Azərbaycan Kinotənqidçilər və Kinoşünaslar Gildiyası 2024-cü ilin ən yaxşı filmlərini açıqladı
Azərbaycan Kinotənqidçilər və Kinoşünaslar Gildiyası 2024-cü il ərzində böyük ekrana çıxan bədii və sənədli filmləri qiymətləndirərək müxtəlif peşəkar nominasiyalar üzrə ən yaxşı ekran işlərini müəyyənləşdirib. Gildiyanın rəhbəri professor Nadir Bədəlovun başçılığı ilə 17 nəfərlik kinoyazar heyəti bu dəfə həm kinoteatrlarda prokata buraxılmış, həm də festivallarda nümayiş olunmuş 40-a yaxın filmi nəzərdən keçirib.
Crossmedia.az xəbər verir ki, qiymətləndirmə 10 ballıq sistemlə aparılıb, və nominasiyalarda ardıcıllıq təsadüfi olsa da, diqqətçəkən bir neçə film əsas kateqoriyalarda paralel şəkildə təkrar-təkrar ön plana çıxıb.
Ən yaxşı ssenari nominasiyasında bu il 6 fərqli ekran işi seçilib. Onların sırasında “Qapı”, “Səma ilə görüş”, “Tənha insanın monoloqu”, “Səriyyə”, “İtən gündəlik” və “21-ci möcüzə” yer alır. Ssenarilərdəki müxtəliflik, həm klassik, həm də eksperimental üslubları özündə birləşdirən yanaşmaların güclü rəqabət yaratdığını göstərir.
Ən yaxşı rejissor işi nominasiyasında isə Rüfət Şahbazov (“Səma ilə görüş”), Hikmət Rəhimov (“Apatiya – 1”), Vüsal Əhmədzadə (“Qapı”), Emin Əfəndiyev (“Tənha insanın monoloqu”), Şahin Qəhrəman (“21-ci möcüzə”) və Fuad Quliyev (“Qarabağ FK: 30 mövsüm səfərdə”) öz imzalarını önə çıxara biliblər.
Ən yaxşı operator işi kateqoriyasında Şahmar Səfəroğlu, Həsən Aslanov, İman İmanov, Vladimir Artyemev, Daniel Quliyev kimi peşəkar adlar diqqət çəkir. Eyni adların bir neçə filmdə təkrar-təkrar görünməsi onların bu il ekran işlərinə verdiyi töhfənin böyüklüyünü təsdiqləyir.
Musiqi həlli üzrə nominasiyada isə Əflatun Abdullayev (“Apatiya-1”), Sədaqət Kərimova (“İtən gündəlik”), Ruhin Məmmədov (“Səma ilə görüş”), Rüstəm Zeynallı (“21-ci möcüzə”), Etibar Əsədli (“Tağıyev: Neft”) və Azər Hacıəsgərli (“Tənha insanın monoloqu”) fərqləndirilib.
Ən yaxşı aktyor nominasiyasında Nurlan Rüstəmov (“Qapı”), Tural Baxış (“Apatiya-1”), Taleh Yüzbəyov (“Səma ilə görüş”) kimi tanınmış simalarla yanaşı, “İtən gündəlik”dəki kollektiv çıxış da qiymətləndirilib.
Ən yaxşı aktrisa nominasiyasında isə Zemfira Əbdülsəmədova (“Hozu dayə”) , Kəmalə Piriyeva həm “21-ci möcüzə”, həm də “Səma ilə görüş”dəki çıxışları ilə diqqət mərkəzinə düşüb. Şəhla Əliqızı (“Apatiya-1”), Nazı Heydərova (“Səriyyə”) da bu sırada yer alıblar.
Ən yaxşı film nominasiyası üzrə bu altı ekran işi bir-birindən maraqlıdır: “Qarabağ FK: 30 mövsüm səfərdə”, “Qapı”, “Səma ilə görüş”, “Apatiya-1”, “Aktyor” və “Tənha insanın monoloqu”.
Qısametrajlı filmlər sahəsində isə “Quyu”, “Uzaq”, “Lent”, “2-ci planetin qırmızı rəngi”, “Səssizliyin qanadı yoxdur” və “Şam bağı” bədii film kateqoriyasında; sənədli film kateqoriyasında isə “Evsiz qalmış ay”, “Novruznamə”, “Prius”, “Tanrının xilas əli”, “Babamın evi” və “Pov: memory” seçiliblər.
Bu seçkilər bir daha göstərdi ki, yerli kino artıq həm forma, həm də məzmun baxımından öz sözünü deməyə başlayır. Bir-birindən fərqli rejissor yanaşmaları, güclü aktyor ifaları və incə estetik duyumla işlənmiş vizual dünyalar bu il Azərbaycan kinosunda parlaq izlər qoydu.
Görünən odur ki, 2024-cü il, Azərbaycan kino tarixində həm keyfiyyət, həm də çeşid baxımından yadda qalan il kimi qeyd olunacaq.
Ayan Sədi
15:45 05.04.2025
Oxunuş sayı: 4314
