Nintendo Switch 2 təqdim olundu: Yeni funksiyalar və qiyməti

Nintendo yeni nəsil oyun konsolu olan Nintendo Switch 2-ni rəsmən təqdim edib. Yeni cihaz həm aparat, həm də proqram təminatı baxımından böyük yeniliklərlə gəlir.
Crossmedia.az xarici mediaya istinadən bildirir ki, Switch 2-nin diqqətçəkən yeniliklərindən biri Joy-Con 2 nəzarətçilərində yerləşən C düyməsidir. Bu düymə sayəsində GameChat funksiyası aktiv olur və oyunçulara oyun zamanı dostları ilə danışmağa imkan verir. İnteqrasiya olunmuş mikrofonla səs keyfiyyəti yaxşılaşdırılıb.
Bundan əlavə, konsol kamera sistemi ilə təchiz edilib. Bu kamera vasitəsilə oyun zamanı video zənglər etmək və GameShare funksiyası ilə bir oyunu birdən çox cihazda oynamaq mümkündür. Nintendo bu xüsusiyyətin gələcək oyunlarda daha geniş istifadə olunacağını bildirib.
Yeni Switch 2 7,9 düymlük 1080p HDR dəstəkləyən ekranla təchiz edilib və 120 fps görüntü imkanına malikdir. Joy-Con 2-lər daha böyük analoq çubuqlarla, təkmilləşdirilmiş düymələrlə və güclü maqnit birləşməsi ilə yenilənib. Konsolda 256 GB daxili yaddaş, ikili USB-C portu və tənzimlənən dayaq yer alır.
Səs sistemində də irəliləyişlər var: 3D audio, səs-küy ləğvi texnologiyası və təkmilləşdirilmiş daxili dinamiklər daha keyfiyyətli audio təcrübə vəd edir. Konsolu televizora qoşduqda 4K HDR görüntü və sabit performans üçün daxili soyutma sistemi də təqdim olunur.
Yeni cihazla birlikdə “Mario Kart World”, “Super Mario Party: Jammer”, “Metroid Prime 4: Beyond” və digər məşhur seriyaların yenilənmiş versiyaları çıxacaq. Bundan əlavə, platformada “Hogwarts Legacy”, “Civilization 7” və “EA Sports FC” kimi üçüncü tərəf oyunlar da olacaq.
Nintendo Switch 2-nin Türkiyədə təxmini satış qiyməti isə (təxminən 1300 AZN) olaraq göstərilir.
Zəhra Ağayeva
15:03 05.04.2025
Oxunuş sayı: 679