Sərt bəyanat: Güney Azərbaycanın qərbində Urmiya və digər şəhərlərin azərbaycanlılara məxsus olduğu qəbul edilməlidir
Güney Azərbaycanın qərbində qədim türk şəhəri olan Urmiyada Novruz bayramı ərəfəsində İran rejimi Azərbaycan türklərinə ərazi iddiası olan mühacir və terrorçu kürd qruplarına Novruz bayramını keçirməyə icazə verib. Lakin Urmiyada Azərbaycan türkünə, öz torpaqlarında, öz şəhərlərində Novruz mərasimini keçirməyə icazə verilməyib.
Crossmedia.az xəbər verir ki, bu barədə Güney Azərbaycanın Demokratik Türk Birliyinin (GADTB) Güney Azərbaycanlıların xaricdəki təşkilatlarına və azərbaycanlılara Urmiya məsələsi ilə bağlı müraciətində bildirilib.
“Burada maraqlı bir sual yaranır: Necə olur ki, Urmiyada İran və İraq müharibəsində bu bölgəyə yerləşən mühacir kürdlər və onların terrorçu qrupları - Kürd Demokrat Partiyası, Komele, PEJAK və PKK bu terror təşkilatlarının tərəfdarları beş minə yaxın mühacir bayram keçirə bilir və hətta silahlarla atəş açıb, Azərbaycan türkünə qarşı hərəkət sərgiləyə bilirlər?
Biz Güney Azərbaycanlı Türk Milləti, bu torpaqların sahibləri olaraq, heç vaxt kürd mühacirlərə və digər etniklərə heç bir problem yaşatmamışıq. Eyni zamanda, bu torpaqlarda yaşayan digər qeyri-türklərə də heç bir narazılığımız yoxdur. Hər bir fərd, hansı etnosdan olursa olsun, bizim vətəndaşımızdır. Ancaq torpaqlarımıza göz dikən və məhdudlaşdırmaya çalışanlar Azərbaycan türkünə və torpaqlarına düşmən sayılırlar. Hər kəsin bildiyi kimi, keçən yüz ildə böyük güclər Azərbaycan əleyhinə kürdləri, farsları və erməniləri silahlandırıb, maliyyələşdirib və güclü media ilə onlara dəstək verib. Bu gün Azərbaycan və Türkiyəyə qarşı hər cür çirkin terror fəaliyyətlərinə də əl atırlar. Bu oyunlarla bağlı iki məsələ açıq şəkildə özünü göstərməlidir. Birincisi, bir ovuc kürd mühacirin kürd milləti adı altında təşkil etdikləri terrorçu qruplar millətimizin milli şuuru və vətənpərvərliyini görməli, ikincisi isə milyonlarla türkün bu torpaqların sahibləri olduğunu anlamalı və buna hörmət etmələri vacibdir. Yoxsa tarixdə olduğu kimi, həddini bilməyən istənilən mühacir gəldiyi kimi getməli olacaq. Azərbaycan türk milləti qonaqpərvər, mühacir sevən və çox səbirli bir millətdir. Kürdlər tarixdən dərs almalı və öz yerində oturmalıdırlar, əks halda özləri üçün arzu olunmaz nəticələrə səbəb olacaqlar. Bizim xaricdə olan Güney Azərbaycanla bağlı milli-siyasi yönümdə fəaliyyət göstərən təşkilatlarımızdan hər hansı biri, kürd adı altında bizim torpaqlarımıza göz dikən və türk düşmənləri ilə, terrorçu qruplarla müzakirə apararsa, bu, millətimizə xəyanət hesab edilər. Bu hərəkətlərə qarşı olmaq lazımdır. Yalnız hansı kürd təşkilatları ki, Güney Azərbaycana və qardaş ölkəmiz Türkiyəyə qarşı bir iddiaları yoxdur, onlarla dostluq münasibəti saxlanıla bilər. Əks halda, kürd təşkilatları ilə qurulan münasibət millətə xəyanət hesab ediləcəkdir! Güney Azərbaycan türklərinin torpaqlarında baş qaldıran və ərazi iddiaları olan etnik qruplar, silahlanaraq təhdid etdikləri müddətcə uyğun cavablarını alacaqlar. Onlar tarixdən dərs almalılar və bu cür oyunlara girməməlidirlər. Güney Azərbaycanın qərbində Urmiya və digər şəhərlərin azərbaycanlılara məxsus olduğu qəbul edilməlidir. Biz tarixdən dərs alıb və hər kəsin Azərbaycan torpaqlarında sülh və barış şəraitində yaşamasını arzu edirik. Tarixdə gözümüzün önündə ruslar, Qərb ölkələri, ermənilər, kürdlər və farslar Azərbaycan türk millətinə və Türkiyəyə qarşı nə qədər oyunlar qurublarsa, türk millətinin mübarizəsi nəticəsində hamısı yeniliblər.
Azərbaycana kürdlərin köçürülməsi və fars idarəçiliyi ərazidə siyasi və strateji məqsədlər üçün qəsdən aparılan demoqrafik dəyişikliklər, Yaxın Şərqdə uzun müddətdir davam edən mühüm bir geosiyasi əməl olub. Güney Azərbaycanın tarixi Türk kimliyinə sahib olan bu bölgələrində İran rejimi tərəfindən həyata keçirilən etnik siyasət son bir əsrdə bu ərazinin sosial, mədəni və siyasi mənzərəsini formalaşdırıb. Bu ərazilərdə kürdlərin yerləşdirilməsi ilə güc tarazlığı dəyişdirilib, bu dəyişikliklər isə Azərbaycan torpaqları və azərbaycanlıların haqqına ziyan verib”,- deyə bəyanatda bildirilir.
Nəzrin Salmanova
09:29 02.04.2025
Oxunuş sayı: 2735
