Sosioloq sərt danışdı: "Belə hallar pedofiliya kimi qiymətləndirilməlidir"
Ağcabədidə 23 yaşlı şəxs 13 yaşlı qızla ailələrin razılığı ilə nişanlanıb. Nişandan sonra onların cinsi münasibətdə olduğu və qızın hamilə qaldığı məlum olub. Ailələr məsələni gizlətməyə çalışsa da, qız xəstəxanaya gedərkən həkimlər polisi məlumatlandırıb. Bundan sonra cinayət işi açılıb. Məhkəmə istintaqı dövründə onların övladı dünyaya gəlib, lakin zərərçəkmiş və ailəsi şikayətçi olmayıb. Bu hal yüngülləşdirici amil kimi nəzərə alınıb.
Bu, Azərbaycan cəmiyyətində baş verən ilk belə hal deyil. Əvvəllər də dəfələrlə 18 yaşına çatmamış qızların ailə həyatı qurmağa məcbur edildiyinin və hamilə qaldıqlarını eşitmiş. Bu, nəinki bir nəfərin gələcəyini, həm də ailənin məhvi olmaqla cəmiyyət üçün çox təhlükəli tendensiyadır.
Belə hallar barədə Crossmedia.az-a danışan sosioloq Lalə Mehralı bildirib ki, belə halların arxasında əvvəlcədən planlaşdırılmış niyyətlər dayanır: "Vəziyyət kənardan təsadüfi görünə bilər. Amma mən hesab edirəm ki, nişanlanma və nişan müddətindəki münasibət əvvəlcədən planlaşdırılıb. Məqsəd odur ki, sabah bu hadisə aşkarlananda, hüquq-mühafizə orqanları və məhkəmə qarşısında yumşaldıcı arqument irəli sürsünlər. "Onsuz da nişanlı idilər, evlənməyə hazırlaşırdılar" kimi ifadələrlə məsələni ört-basdır etməyə çalışırlar. Hakimin də doğulacaq uşağı nəzərə alaraq yumşaq qərar verməsinə ümid edirlər".
Sosioloq vurğulayıb ki, 13 yaşlı bir uşağın tanımadığı biri ilə tək buraxılması yolverilməzdir:
"Normal valideynlər nəinki övladlarını nişanlamaq, hətta yad biri ilə tək buraxmağın belə yanlış olduğunu bilirlər. Amma bəzi valideynlər bu addımı əvvəlcədən hesablayaraq atır ki, gələcəkdə bu məsələyə bəraət qazandıra bilsinlər. Bu zehniyyət kökündən dəyişməlidir. 13 yaşlı uşağın həyatını planlaşdırmaq, onu məcburi münasibətə yönləndirmək valideynlərin səlahiyyəti olmamalıdır. Belə hallarda dövlət müdaxilə etməli, uşağı qoruma altına almalı, valideynləri isə ciddi cəzalandırmalıdır".
O, qeyd edib ki, bu cür hadisələrə sadəcə erkən nikah kimi baxmaq olmaz:
"Burada məsələ erkən nikah deyil, pedofiliyadır. 13 yaşlı bir uşaq evliliyə məcbur edilə bilməz. 16-17 yaşında belə hallar müəyyən qədər anlaşıla bilər, amma 13 yaş mümkün deyil. Bu, uşaq istismarı və cinayətdir. Dövlət də bu məsələni erkən nikah kimi deyil, məhz pedofiliya kimi dəyərləndirməli və ağır cəza tətbiq etməlidir".
Fatimə Məmmədova
15:45 24.03.2025
Oxunuş sayı: 1025
