“Azərkosmos” “Azerspace-1” üzərindən “IoT” xidmətini aktivləşdirib
“Azərkosmos” “DynaSys Networks” şirkəti ilə əməkdaşlıq çərçivəsində “Azerspace-1” peyki üzərindən “Əşyaların İnterneti” (IoT) xidmətini aktivləşdirib.
Bu barədə Crossmedia.az-a Azərbaycan Kosmik Agentliyindən məlumat verilib.
Bildirilib ki, bu addım “Azərkosmos”un qabaqcıl texnologiyaları və inkişaf etmiş peyk rabitə xidmətlərini “IoT” ekosistemi ilə birləşdirərək, kənd təsərrüfatı və hava keyfiyyətinin izlənməsi kimi sahələrdə ən müasir həllərin tətbiqinə imkan yaradır.
“Azərkosmos”un “DynaSys” ilə əməkdaşlığı, həmçinin “Azərkosmos”a öz peyk şəbəkə infrastrukturunu “DynaSys”in hərtərəfli “IoT” platforması ilə inteqrasiya etmək imkanı verir. Bu da öz növbəsində, Avropa, Yaxın Şərq və Afrika regionlarında istifadəçilərə innovativ “IoT” tətbiqləri ilə əməliyyat səmərəliliyini artırmağa, resursları daha effektiv idarə etməyə və yeni gəlir axınları yaratmağa imkan yaradacaq.
“IoT” texnologiyası müxtəlif sahələrdə tətbiq olunur, məsələn, kənd təsərrüfatında suvarma sistemlərinin uzaqdan izlənməsi və nəzarət edilməsi, sənaye avadanlıqlarının peyk üzərindən izlənməsi, əmlakın izlənilməsi, gəmi donanmasının idarə olunması, ətraf mühitin davamlılığı, biznes prosesləri və bank xidmətləri sahəsində - müştəri davranışlarının izlənməsi, təhlükəsizlik tədbirlərinin gücləndirilməsi və ödəniş sistemlərinin optimallaşdırılması üzrə tətbiq sahələri mövcuddur.
Qeyd edək ki, “DynaSys Networks” Pakistan və Birləşmiş Ərəb Əmirliklərində məhsulun inkişafı və sistem inteqrasiyasında innovasiyaların təşviqinə yönəlmiş texnologiya startapıdır.
18:02 19.03.2025
Oxunuş sayı: 840
