Parlamentdə gözlənilən qərar, nəhayət, qəbul olundu
Azərbaycan Milli Məclisi bu gün keçirilən plenar iclasında qanunvericiliyə Azərbaycan işarət dili anlayışının əlavə edilməsini nəzərdə tutan dəyişiklikləri birinci oxunuşda qəbul edib. Dəyişikliklərə əsasən, “18 yaşınadək əlilliyi müəyyən edilmiş şəxslər” ifadəsi “əlilliyi olan uşaqlar” ilə əvəz olunur. Qanun layihəsi BMT-nin Əlilliyi olan şəxslərin hüquqları haqqında Konvensiyasına uyğun olaraq, əlilliyi olan şəxslərin məlumat əldə etmə hüququnu təmin edir və işarət dilini rəsmi ünsiyyət dili kimi qəbul edir. Dövlət büdcəsindən maliyyələşən televiziya yayımçıları isə proqramlarında işarət dili tərcüməsini təmin edəcəklər.
Mövzu ilə bağlı Crossmedia.az-a sosioloq Lalə Mehralı açıqlama verib.
O bildirib ki, əvvəllər xəbər buraxılışlarının əhəmiyyəti televiziya verilişlərinin alt hissəsində işarə dili ilə informasiya ötürülməsi vasitəsilə təmin olunurdu çünki bu əlilliyi olan insanlar üçün vacibdir: "Bu, televiziya yayımlarının borcudur. Əvvəllər hər bir əhəmiyyətli xəbər buraxılışı, o cümlədən son dəqiqə xəbərləri də daxil olmaqla əsasən işarə dili ilə təqdim olunurdu. Lakin son zamanlar, şəxsi müşahidələrimə əsasən, belə bir xidmətə çox az rast gəlinir və ya heç yoxdur. Əslində, dövlətin bu hüququ onlara verdiyi və təmin olunması lazım olduğu üçün bu məsələ əhəmiyyətlidir".
Sosioloq vurğulayıb ki, əvvəllər televiziya yayımlarında əhəmiyyətli xəbərlərin çoxunda işarə dili istifadə edilirdi. "Ancaq son illər sosial şəbəkələrin artması, informasiya bolluğunun yaranması və saytların çoxalması ilə əlaqədar olaraq bu xidmətin ehtiyacı azalmış kimi görünə bilər. Lakin əslində işarə dili ilə informasiya ötürülməsi hələ də vacibdir, çünki bəzən insanların internetə çıxışı olmur və onlar yeganə informasiya mənbəyini televiziyadan alırlar".
"Bu insanların hüquqlarını qorumaq üçün həmin xidmət təmin edilməlidir. Cəmiyyətin empatiya bacarığı bu məsələdə mühüm rol oynayır. İnsanlar işarə dili öyrənməli və bu, heç kim üçün çətin olmamalıdır. Əslində, bu cür çətin anlarda işarə dili ilə onlara kömək etmək və onları yalnız hiss etdirməmək üçün biz də bu bacarığı qazanmalıyıq. Düşünürəm ki, cəmiyyət maarifləndirilməli və bu mövzuda daha çox məlumat verilməlidir",-deyə L. Mehralı qeyd edib.
17:30 07.03.2025
Oxunuş sayı: 2337
