Naxçıvanın enerji təhlükəsizliyi və regional inkişaf: Azərbaycan-Türkiyə Birliyi
"İğdır-Naxçıvan qaz kəmərinin açılışı Azərbaycan və qardaş Türkiyə arasındakı strateji tərəfdaşlığın və sarsılmaz dostluğun növbəti bariz nümunəsidir". Crossmedia.az xəbər verir ki, bunu Milli Məclisin deputatı Mahir Süleymanlı Prezident İlham Əliyevin Türkiyəyə səfərini şərh edərkən bildirib.
Millət vəkili qeyd edib ki, bu layihə Naxçıvanın enerji təhlükəsizliyini təmin etməklə yanaşı, eyni zamanda bölgənin sosial-iqtisadi inkişafına mühüm töhfə verir və strateji əhəmiyyət daşıyır.
Azərbaycan qazının Türkiyə üzərindən svop mexanizmi ilə Naxçıvana çatdırılması muxtar respublikanın enerji təminatını diversifikasiya edərək, onun sabit və etibarlı mənbədən qaz almasına şərait yaradacaqdır.
M.Süleymanlı vurğulayıb ki, bu mühüm infrastruktur Azərbaycan-Türkiyə birliyinin və əməkdaşlığının növbəti uğurudur. Ölkələrimiz enerji sahəsində strateji tərəfdaşlıqlarını dərinləşdirərək regional enerji xəritəsini formalaşdıran əsas güc mərkəzlərinə çevriliblər.
Millət vəkili qeyd edib ki, enerji layihələri ilə yanaşı, nəqliyyat və logistika infrastrukturunun genişləndirilməsi baxımından mühüm əhəmiyyət daşıyan bu layihələr Türk dünyasının daha sıx inteqrasiyasına xidmət edir və regionda yeni imkanlar açır: "Bu möhtəşəm layihənin reallaşmasına verdikləri dəstəyə görə Azərbaycan və Türkiyə dövlət başçılarına dərin minnətdarlığımızı bildiririk".
10:35 06.03.2025
Oxunuş sayı: 3228
