KMG və SOCAR neft-qaz hasilatında birgə layihələrin icrasını müzakirə edib
Qazaxıstanın “KazMunayQaz” (KMG) şirkətinin İdarə Heyətinin (İH) sədri Asxat Xasenov Azərbaycan Dövlət Neft Şirkətinin (SOCAR) prezidenti Rövşən Nəcəflə Bakıdakı görüşündə neft və qazın geoloji kəşfiyyatı və hasilatı sahəsində birgə layihələrin həyata keçirilməsi imkanlarını müzakirə edib.
Bu barədə Crossmedia.az KMG-nin mətbuat xidmətinə istinadən xəbər verir.
“Görüş zamanı geoloji kəşfiyyat və neft-qaz hasilatı sahəsində birgə layihələrin həyata keçirilməsi, investisiyaların cəlb edilməsi, istehsalın rəqəmsallaşdırılması imkanları müzakirə edilib”, - məlumatda qeyd olunub.
A.Xasenov bildirib ki, SOCAR “KazMunayQaz”ın əsas tərəfdaşıdır: “Əminəm ki, biz birgə səylərlə qlobal enerji təhlükəsizliyinin və karbohidrogen ehtiyatlarının sabitliyinin təmin edilməsinə bundan sonra da mühüm töhfələr verəcəyik. Bu da öz növbəsində Xəzər regionunda tranzit imkanları üçün yeni perspektivlər açacaq”.
KMG-dən verilən məlumata görə, görüş zamanı tərəflər 2022-ci ildə iki şirkət arasında Qazaxıstan neftinin Aktau-Bakı marşrutu üzrə nəqli və sonrakı ixrac üçün Bakı-Tbilisi-Ceyhan neft kəməri ilə tədarükünə dair imzalanmış sazişin gedişatını müzakirə ediblər.
“2024-cü ilin sonuna göndərilən neftin həcmi 1,4 milyon ton təşkil edib. Cari ilin planı 1,7 milyon ton neftdir. KMG və SOCAR arasında əməkdaşlığın bu istiqaməti Qazaxıstan və Azərbaycanın tranzit potensialının təşviqinə, eləcə də yerli karbohidrogen ixracının beynəlxalq bazarlara genişləndirilməsinə töhfə verir”, - məlumatda bildirilib.
Bundan əlavə, dekarbonizasiya üzrə şirkətlər arasında strateji sazişin həyata keçirilməsi müzakirə edilib.
“Ötən il Azərbaycanda keçirilən COP29 çərçivəsində imzalanmış sənəd neft-qaz sahəsində zərərli emissiyaların azaldılması üçün karbonsuzlaşdırma və aşağı karbonlu texnologiyaların tətbiqi sahəsində əməkdaşlığın inkişafına yönəlib”, - məlumatda vurğulanıb.
13:33 05.03.2025
Oxunuş sayı: 15532
