Emin Əmrullayev: "Qazaxıstan universitetlərinə həsr olunmuş sərgi akademik əməkdaşlığımız üçün mühüm addımdır"
Təhsil tariximizdə ilk dəfə olaraq Bakıda yalnız Qazaxıstan universitetlərinə həsr olunmuş sərgi keçirilir. Bu tədbir akademik əməkdaşlığımız üçün mühüm bir addımdır. İnanıram ki, biz addım-addım irəliləyərək dərin və səmərəli əməkdaşlığa nail ola bilərik.
AZƏRTAC xəbər verir ki, bunu elm və təhsil naziri Emin Əmrullayev “Azərbaycan və Qazaxıstan arasında ali təhsildə əməkdaşlığın genişləndirilməsi” mövzusunda dəyirmi masada deyib.
Nazir bildirib ki, xarici tələbələrlə bağlı qaydalara və universitetlərin milli siyasətinə diqqətlə yanaşılmalıdır: “Tələbə mübadiləsi, mədəni dialoq və gənc nəsillər arasında əlaqələrin gücləndirilməsinə fokuslanmalıyıq. Lakin universitetlərin mahiyyəti uzunmüddətli perspektivdə elmi-tədqiqat fəaliyyətinə əsaslanır. Universitetləri həqiqətən dəyərli edən onların elmi biliklərə və innovasiyalara verdiyi töhfədir. Bundan sonra qarşımıza konkret hədəflər qoymalıyıq. Neçə birgə elmi-tədqiqat layihəsi həyata keçiriləcək? Universitetlərimiz və alimlərimiz neçə ortaq elmi məqalə hazırlayacaq? Akademik mühitdə birgə fəaliyyətimizi necə daha da gücləndirə bilərik? Bu suallara cavab tapmaq bizim tərəfdaşlığımızın real və təsirli nəticələr verməsini təmin edəcək. Əsas məqsədimiz ali təhsili gücləndirmək və universitetlərimizin davamlı inkişafını təmin etməkdir”. (Azərtac)
13:11 04.03.2025
Oxunuş sayı: 686
