Azərbaycanın ilk fitnes kitabı ictimaiyyətə təqdim edilib
Libraff kitab evində Beynəlxalq İdman Mətbuatı Assosiasiyasının üzvü, fitnesoloq Əkbər Kərimovun “Fitnes Nədir?” adlı kitabın təqdimat mərasimi keçirilib.
Crossmedia.az xəbər verir ki, TEAS Press tərəfindən Azərbaycan dilində nəşr olunmuş "Fitnes Nədir?" kitabına müəllifin iyirmi illik təcrübəsi və bilikləri, sağlamlıq metodikası, məşqlər və qidalanma, sağlam həyat tərzi və motivasiya dəstəyi, psixologiya və etika, arzuolunmaz zədələr və s. ilə bağlı tövsiyələr daxil edilib. Kitab həm böyüklər, həm də uşaqlar üçün nəzərdə tutulub. Uğurlu fitnes mütəxəssisi olmaq üçün anatomiyaya, fiziologiyaya, psixologiyaya, idmana və idman qidalanmasına dair dərin biliklərə sahib olmaq vacibdir. Belə bir mütəxəssis yalnız düzgün qidalanma və idman vasitəsilə optimal fiziki formaya çatmağa kömək etmir, həm də bu formanı ömür boyu qoruyub saxlamağa kömək edir.
"To fit" felinin birbaşa tərcüməsi "yaxşı formada olmaq" kimi səslənir. Məhz bu felin əsasında "fitnes" adlı idman istiqaməti yaranıb. Fitnes məşqlərinin əsas məqsədləri əzələ relyefini formalaşdırmaq, bədən çəkisini azaltmaq və sağlamlığı gücləndirməkdir. Lakin unutmaq olmaz ki, fitnes sadəcə idman zalına getməkdən ibarət deyil. Bu, bir həyat fəlsəfəsidir və ümumilikdə sağlamlığı yaxşılaşdırmağa, bədəni və ruhu möhkəmləndirməyə və əhval-ruhiyyəni yüksəltməyə imkan verir. Xüsusi bir mədəniyyət, rejim, qidalanma, həyata və sağlamlığa baxış – bu, imtina edilməsi mümkün olmayan həqiqi bir fəlsəfədir.
Tədbirdə çıxış edən qonaqlar kitabın əslində bir dərslik olduğunu, maraqlı məlumatlarla zəngin və öyrədici məzmununun olduğunu vurğulayıblar.
Tədbir çərçivəsində Ramazan ayında fitnes mövzusunda və qəhvə içkiləri barədə iki mini-seminar keçirilib. (Trend)
20:46 02.03.2025
Oxunuş sayı: 2068
