Xətai rayonunda yol problemi: İcra Hakimiyyətindən açıqlama
Xətai rayonunun Polad Həşimov küçəsində yaşayan sakinlər yolların bərbad vəziyyətdə olmasından şikayətçidirlər.
Onların sözlərinə görə, ara küçələrdə asfalt örtüyü olmadığı üçün yağışlı havalarda yollar palçıq içində qalır və hərəkət çətinləşir.
Sürücülər maşınlarını idarə etməkdə çətinlik çəkir, piyadalar isə palçığa batmadan irəliləmək üçün alternativ yollar axtarmağa məcbur olurlar.
Sakinlər bildirirlər ki, bu problem barədə Xətai Rayon İcra Hakimiyyətinə artıq müraciət ediblər. Hətta Polad Həşimov adına parkın açılışı zamanı İcra Hakimiyyətinin başçısına yolların pis vəziyyətdə olması ilə bağlı şikayətlərini bildiriblər. Məhz həmin vaxt icra başçısı yolun asfaltlanması ilə bağlı tapşırıq verdiyini deyib. Lakin üstündən uzun müddət keçməsinə baxmayaraq, bu istiqamətdə heç bir iş görülməyib.
Xətai rayonunun Polad Həşimov küçəsində yolların bərbad vəziyyətdə olması ilə bağlı sakinlərin şikayətlərinə cavab olaraq, Xətai Rayon İcra Hakimiyyətinin ictimai-siyasi və humanitar məsələlər şöbəsinin müdiri Pənah İmanov Crossmedia.az-a açıqlama verib.
O bildirib ki, kommunikasiya məsələləri, o cümlədən kanalizasiya, su və digər infrastruktur işlərinin böyük hissəsi həll olunub. Lakin bu ərazidə hələ də görülməli işlər qalıb. Pənah İmanovun sözlərinə görə, burada yalnız yolların abadlaşdırılması deyil, həmçinin parkın salınması və ümumi infrastrukturun qurulması nəzərdə tutulub.
"Xətai rayonunun ərazisi olduqca böyükdür. Rayon ərazisində abadlıq və quruculuq işləri mərhələli şəkildə aparılır. Yeni infrastruktur layihələri həyata keçirilir, minlərlə ağac əkilib. Xüsusilə 8 Noyabr prospektində geniş yaşıllaşdırma işləri görülüb. Biz bu işləri həm İH başçısının tapşırıqlarına əsasən, həm də vətəndaşlıq borcu kimi sevərək həyata keçiririk", – deyə İmanov vurğulayıb.
Vətəndaşların “Niyə hər yerdə eyni vaxtda işlər aparılmır?” sualına cavab verən icra nümayəndəsi qeyd edib ki, rayonun böyüklüyünü nəzərə alaraq işlər mərhələli şəkildə həyata keçirilir. Onun sözlərinə görə, hazırda Xətai rayonunun bəzi ərazilərində abadlıq işləri aparılır və havalar düzəldikdən sonra asfaltlama işlərinə də başlanacaq.
“Xətai rayonu geniş ərazini əhatə etdiyindən işlər mərhələli şəkildə həyata keçirilir. Hazırda müəyyən ərazilərdə abadlıq və quruculuq işləri gedir. Havalar düzələndən sonra rayon ərazisində asfalt örtüyünün yenilənməsi işlərinə başlanacaq. Hazırda bəzi obyektiv səbəblərdən müəyyən ləngimələr olub, lakin proses bərpa olunub və işlər davam etdirilir”, – deyə o əlavə edib.
Sonda Pənah İmanov sakinlərdən anlayışlı və səbirli olmağı xahiş edərək, görülən işlərin nəticələrinin tezliklə hiss olunacağını bildirib.
Nihat Tahirov
15:36 28.02.2025
Oxunuş sayı: 1094
