Dövlət Komitəsinin kollektivi “Ana harayı” abidəsini ziyarət edib
Xocalı soyqırımının 33-cü ildönümü ilə əlaqədar Qaçqınların və Məcburi Köçkünlərin İşləri üzrə Dövlət Komitəsinin kollektivi Bakı şəhərində faciə qurbanlarının xatirəsinə ucaldılmış “Ana harayı” abidəsini ziyarət edib.
Bu barədə Crossmedia.az Komitəyə istinadən xəbər verir.
Bildirilib ki, bu il soyqırımı qurbanlarının xatirəsi, işğaldan azad edilmiş və separatçılardan tam təmizlənmiş Xocalı şəhərinin özündə də qeyd edilib.
Bu, dövlətimizin gücünün nümayişi və şəhidlərimizin xatirəsinə ehtiramın təcəssümüdür.
Xatırladaq ki, işğal dövründə Xocalıdan olan məcburi köçkünlərin müvəqqəti məskunlaşma yerlərində yaşayış şəraitinin yaxşılaşdırılması daim diqqət mərkəzində saxlanılıb. Ötən müddət ərzində, Xocalıdan olan 2494 ailə fərdi yaşayış evi və ya mənzillə təmin edilib. Goranboy rayonunda və Gəncə şəhərində onların yığcam şəkildə məskunlaşması üçün qəsəbələr salınıb.
Hazırda Xocalı rayonunda bərpa və quruculuq işləri aparılır. Bu günədək rayon ərazisində 164 ailə və 766 nəfərin daimi məskunlaşması təmin edilib.
20:06 26.02.2025
Oxunuş sayı: 9416
