14 fevralla bağlı mütəxəssis rəyi: "Sevginin formaları dəyişir"
14 Fevral Sevgililər Günü dünyanın bir çox ölkəsində romantikanın və sevginin simvolu kimi qeyd olunur. Bu günün tarixi Roma dövrünə gedib çıxır və müqəddəs Valentinlə əlaqələndirilir. Rəvayətə görə, o, sevənləri gizlicə evləndirdiyi üçün edam edilib və son məktubunu “Sənin Valentin” imzası ilə göndərib.
Zamanla bu gün sevginin ifadə olunduğu, hədiyyələrin və romantik jestlərin ön plana çıxdığı bir bayrama çevrildi. Müasir dövrdə insanlar bu günü fərqli formalarda qeyd edirlər – kimisi sevdiyinə gül və şokolad hədiyyə edir, kimisi isə xüsusi anlar yaşamaq üçün fərqli tədbirlər planlaşdırır.
Sevgililər Günü təkcə sevgililər üçün deyil, dostluğu və ailə bağlarını qeyd edənlər üçün də özəl bir tarixdir. Sevgi yalnız romantik münasibətlərlə məhdudlaşmır, bu gün həm də dəyər verdiyimiz insanlara sevgimizi ifadə etməyə gözəl fürsət yaradır.
Sosiolq Hüseyn İbrahimov 14 fevralın qeyd olunması ilə bağlı fikirlərini Crossmedia.az-la bölüşüb: “ Bizim cəmiyyət demokratik qloballaşmağa açıqdır. Bu baxımdan dünyada olan bir çox mədəni hadisələrin, bir çox tarixi ənənələrin cəmiyyətimizdə də təkrarlanması təsadüf deyil".
Sevginin insan psixologiyasına təsiri barədə danışan psixoloq Aynur İskəndərova isə söyləyib ki, sevgi anlayışı insanın yaşantılarından asılıdır: "Sevgi anlayışı universal konsept deyil. Hər kəsin onu fərqli şəkildə dərk etməsi mümkündür. Sevgi insanın milliyyətindən, yaşadığı ölkənin etnik-mədəni xüsusiyətlərindən, göz açdığı ailədən, demoqafik vəziyyətindən və yaşadıqlarından asılıdır . Sevgini fərqli anlayan və yaşayan insanın davranışları da fərqli olacaq".
Psixoloq vurğulayıb ki, sevgi əsasən eşqdən başlayır və bu, həm psixoloji, həm də fizioloji prosesdir: " Yəni insan hər hansı bir keyfiyyətinə görə aşiq olur və müəyyən hormonların təsiri ilə müəyyən müddət davam edir. Aşiq insanın eşqinin sevgi ilə davam etməsi üçün artıq müəyyən maneələrdən, imtahanlardan keçməlidir". O, uzunömürlü sevginin zamanla fərqli formalar aldığını bildirib: “Məsələn, bir qadın həyat yoldaşını əvvəl kişi kimi sevir, sonra ailə qurduqdan sonra həyat yoldaşı kimi, daha sonra övladının atası və nəvələrinin babası kimi sevə bilər. Sevginin forması dəyişsə də, özü mövcud qalır".
Nərgiz Məmmədova
23:40 14.02.2025
Oxunuş sayı: 6365
