"DeepSeek" Çinin təbliğat alətinə çevrilib
Çinin süni intellektlə işləyən chatbotu DeepSeek qlobal arenada sürətlə populyarlaşır. Lakin tədqiqatçılar onun cavablarının Çinin rəsmi mövqeyini əks etdirdiyini və Pekinin təbliğatını yaydığını iddia edirlər.
Crossmedia.az xəbər verir ki, NewsGuard şirkətinin dərc etdiyi hesabatda DeepSeek “dezinformasiya maşını” adlandırılıb. Bildirilir ki, chatbot təkcə Çin hökumətinin rəsmi baxışlarını yaymaqla kifayətlənmir, həm də Pekinin tənqidçilərini gözdən salmaq üçün dezinformasiya kampaniyalarına dəstək verir.
Mütəxəssislər qeyd edirlər ki, alət keçmiş ABŞ prezidenti Cimmi Karterin sözlərini təhrif edib. Çin hökuməti daha əvvəl onun çıxışlarını seçmə şəkildə redaktə edərək, Karterin guya Tayvanın Çinə məxsus olduğunu dəstəklədiyi təəssüratını yaratmağa çalışıb.
DeepSeek-in fəaliyyəti TikTok ilə bağlı narahatlıqları xatırladır. Ekspertlər hesab edirlər ki, bu cür texnoloji platformalar Çinin qlobal ictimai rəyi formalaşdırmaq səylərinin bir hissəsidir.
Məlumata görə, DeepSeek Çinin lideri Xi Jinping və digər tabu mövzularla bağlı həssas suallara ya cavab verməkdən imtina edir, ya da mövzudan yayınır. Bu isə Çin hökumətinin texnologiya sahəsinə ciddi nəzarət etdiyini və senzura tətbiq etdiyini göstərir.
22:35 03.02.2025
Oxunuş sayı: 453
