İnternetdə Azərbaycan dilində məlumat qıtlığı: səbəb nədir?
Məlumat əldə etmək üçün ilk müraciət etdiyimiz mənbələr axtarış motorlarıdır. Lakin qarşılaşdığımız əsas problemlərdən biri Azərbaycan dilində informasiyanın olduqca az olmasıdır. Bəzi hallarda isə ümumiyyətlə Azərbaycan dilində məlumat tapmaq mümkün olmur. Bəs Azərbaycan dilində informasiyanın az olmasının əsas səbəbləri nələrdir?
Mövzu ilə bağlı informasiya texnologiyaları mütəxəssisi Eyvaz Kərimov Crossmedia.az-a verdiyi açıqlamasında bildirib ki, informasiya texnologiyaları sahəsində proqramlaşdırma dilləri və proqramların yazıldığı əsas dil ingilis dili olduğuna görə, bu sahədə olan məlumatların əksəriyyəti də ingilis dilində olur:
"İkinci məsələ isə odur ki, hansı ölkədə bu sahə daha çox inkişaf edibsə və kodlaşdırma, proqramlaşdırma sahəsində mütəxəssislərin sayı daha çoxdursa, həmin ölkənin dili üzərində məlumatlar daha geniş olur.
Məsələn, hansısa şirkətdə texnologiya sahəsində bir problem yaranırsa və bu problemi çox adam həll etməyə çalışırsa, həmin problem haqqında internetdə daha çox məlumat yayılır. Yəni, bir problemlə qarşılaşdığınız zaman bu problemi geniş ictimaiyyətlə bölüşüb onun həlli yollarını tapırsınız. Bu isə o deməkdir ki, əgər müəyyən bir dildə məlumatlar çoxdursa, həmin ölkədə texnologiya sahəsində daha çox məlumat mübadiləsi aparılır.
Bizim ölkədə isə informasiya texnologiyalarının inkişafı əsasən Bakı şəhəri ilə məhdudlaşır. Yəni, bu sahədə inkişaf üçün açılmış strukturlar, obyektlər və ya təhsil müəssisələri əsasən Bakıda cəmlənib".
Eyvaz Kərimovun sözlərinə görə, bu səbəbdən bölgələrdə yetişən informasiya texnologiyaları üzrə mütəxəssislərin sayı azdır. Mütəxəssislərin sayı az olduğuna görə də, Azərbaycan dilində məlumatların internetdə, qlobal şəbəkədə az olması təəccüblü hal deyil.
Elnurə Kərimova
20:17 29.01.2025
Oxunuş sayı: 13965
