Ağıllı eynəklə şahmatda mükəmməl gedişlər
17 yaşlı bir gənc, istifadə etdiyi ağıllı eynəkləri hakerlik edərək şahmat oynayarkən ən yaxşı gedişləri göstərməsini təmin edib. Bu cihaz şahmatçılar arasında və texnologiya dünyasında böyük marağa səbəb olub.
Crossmedia.az "TRT Haber"ə istinadən bildirir ki, Nyu-Yorkda yaşayan, Kolumbiya Universitetinin tələbəsi Eddy Xu, inkişaf etdirdiyi texnologiya ilə şahmat dünyasında böyük bir müzakirəyə səbəb olub. Xu, Meta x Ray-Ban ağıllı eynəklərini modifikasiya edərək mükəmməl gedişləri göstərə bilən bir şahmat cihazı yaradıb.
Xu cihazın iş prinsipi ilə bağlı verilən suala cavab olaraq, real şahmat taxtasının rəqəmsal formaya çevrilməsi üçün əvvəlcə künc nöqtələrinin müəyyən edildiyini, sonra görüntülərin normallaşdırıldığını və standart obyekt tanıma modeli istifadə etdiklərini qeyd edib.
Ağıllı eynəklərin iş prinsipi ilə bağlı yanlış şərhlərə də aydınlıq gətirən Xu, bu eynəklərin mövcud modellərində linzalar üzərində ekran olmadığını bildirib. Eynəklərin gördüyü məlumatı bir telefona və ya xarici ekrana ötürdüyünü, sonra səs ucaldanlar vasitəsilə istifadəçiyə çatdırıldığını deyib. Bununla belə, META sosial şəbəkə şirkətinin gələcək modellərində daxili ekran texnologiyasının inteqrasiya edilə biləcəyi barədə şayiələr mövcuddur. Bu hadisə şahmat icmasında müzakirələrə səbəb olub.
Məlumata görə, bəzi insanlar şahmatın dürüstlük prinsiplərinə zərər verilə biləcəyindən narahatdırlar.
Qeyd edək ki, bu yenilik təkcə şahmat dünyasında deyil, həm də ağıllı eynək texnologiyasının gələcəyi üçün yeni suallar doğurur. Şahmat icması bu cür texnologiyaların təsirlərini müzakirə edərkən, Eddy Xu-nun bu işi artıq dönüş nöqtəsi kimi qiymətləndirilir.
Fatimə Məmmədova
08:05 15.01.2025
Oxunuş sayı: 19125
