Hadisə

"Mücahid Ömrü: Məhəmmədsadıq Aran" kitabının təqdimatı keçirildi

Sosial Tədqiqatlar Mərkəzində keçirilən təqdimatda iştirak edən qonaqlar, Məhəmmədsadıq Aranın həyatı və yaradıcılığından bəhs edərək, kitabın Qərbi Azərbaycan və onun ziyalılarının tanıdılmasında mühüm əhəmiyyətini qeyd etdilər.
İlk olaraq Milli Məclisin deputatı Məlahət İbrahimqızı çıxış edərək, həyatının böyük hissəsini Türkiyədə türklüyə və Azərbaycana xidmətdə keçirən siyasi-ədəbi mühacir Məhəmmədsadıq Aranın bu sahədə əziyyətlərindən və töhfələrindən bəhs etdi.

"Belə bir şəxsiyyət haqqında araşdırmalar edib, tərcümeyi-halının, yaradıcılığının bütün məqamları ilə əks olunduğu bir kitab üçün təşəkkür edirəm. Burada həmçinin Qərbi Azərbaycan mövzusu da diqqətimi çəkdi və o yerlərdən olan bir şəxs olaraq deyə bilərəm ki, cənab Prezidentin də qeyd etdiyi kimi bu mövzu hər zaman ölkəmizin diqqət mərkəzində olub və indi elədir".
Daha sonra Türkiyənin Azərbaycandakı Səfirliyinin mətbuat müşaviri Cihangir İşbilir çıxış etdi.

"Böyük Məhəmmədsadıq Aranla bağlı bu mühüm kitaba nəzər yetirdim və sanki onun mübarizəsi, üzləşdiyi əziyyətlərin hər birinə şahid oldum. Kitabda böyük şəxsiyyətin əzminin, Türkiyədə olduğu zamanlar göstərdiyi fəaliyyətin əks olunmasını da yüksək qiymətləndirirəm".
Tədbir zamanı Sosial Tədqiqatlar Mərkəzinin sektor müdiri Əfqan Vəliyev, "Füyuzat" jurnalının baş redaktoru Mübariz Yunuszadə, Qərbi Azərbaycan İcmasının mətbuat katibi Ülviyyə Zülfiqar və Məhəmmədsadıq Aranın qohumları çıxış etdilər. Onlar kitab, onun dünya verdiyi töhfələrdən bəhs edərək, o cümlədən M.Aranla bağlı xatirələrini bölüşdülər.
Tədbirin sonunda iştirakçılara imzalı kitablar təqdim edildi.

Aytac Kərimova
Banuçiçək Kalbaliyeva