ABŞ Ukraynaya NATO üzvlüyü müqabilində Donbasdan çəkilməyi təklif edib?
ABŞ ilk dəfə Ukraynanın Donbasdan çıxması müqabilində NATO-ya üzv olması ehtimalını müzakirəyə çıxarıb.
Crossmedia.az xəbər verir ki, “İnterfaks-Ukrayna” agentliyi bu barədə məlumat yayıb.
Zelenski bildirib ki, Amerika tərəfi danışıqlar zamanı Ukraynanın NATO-ya üzvlüyü ilə Donbasdan geri çəkilməsi arasında mümkün əlaqə barədə sual qaldırıb.
“Amerikalılar belə bir sual verdilər: "Bəs Ukrayna NATO-ya üzv olsa, Donbasdan çıxarmı?" Bu, ilk dəfə idi”, – deyə Ukrayna lideri vurğulayıb.
Prezident qeyd edib ki, söhbət konkret və rəsmi təklifdən deyil, danışıqlar zamanı səsləndirilmiş ehtimaldan gedir.
Zelenski Ukraynanın öz ərazilərindən imtina etmək niyyətində olmadığını və işğal altındakı torpaqlar üzərində Rusiyanın suverenliyini tanımayacağını bildirib.
O, eyni zamanda, belə bir təklifin rəsmi şəkildə təqdim olunacağı təqdirdə ictimai müzakirəyə çıxarılacağını istisna etməyib.
Ukrayna liderinin sözlərinə görə, ölkənin təhlükəsizlik təminatları və ərazi bütövlüyü ilə bağlı qərarlar cəmiyyətin mövqeyi nəzərə alınmaqla qəbul edilməlidir.
Qeyd edək ki, ABŞ tərəfi bundan əvvəl Donbasdan geri çəkilmə müqabilində Ukraynaya NATO üzvlüyünə bənzər təhlükəsizlik təminatlarının verilməsi imkanını da müzakirə edib.
Lakin Zelenski bu cür təminatların NATO-ya tamhüquqlu üzvlüklə eyni olmadığını vurğulayıb.
Hazırda Ukraynanın Donbasdan çıxması müqabilində NATO-ya qəbuluna dair rəsmi razılaşma mövcud deyil.
14:14 14.11.2026
Oxunuş sayı: 43
