Qızı gözləri qarşısında yandı, atası isə musiqi klipi çəkdirməyə yollandı
ABŞ-də ata bir yaş yarımlıq qızının isti sudan ağır yanıq xəsarətləri almasına baxmayaraq, onu xəstəxanaya aparmayıb, musiqi klipi çəkilişinə gedib.
Crossmedia.az xəbər verir ki, “Law & Crime” bu barədə məlumat yayıb.
Məlumata görə, 20 yaşlı Obri Makklendon qızını çimizdirərkən vannadan çıxıb və suyu açıq qoyub. O, sonradan istintaqa bildirib ki, uşaq özü isti su kranını açaraq yanıb. Ata qızının dərisində qızartılar görsə də, vəziyyətin ciddi olmadığını düşünüb.
Makklendon ilkin tibbi yardım vasitələri aldıqdan sonra uşağı xalasının yanına qoyub və özü musiqi klipi çəkilişinə yollanıb.
Ertəsi gün körpənin vəziyyəti ağırlaşıb. Uşaqda qıcolmalar başlayıb, ağzından köpük gəlib. Yaxınları təcili tibbi yardım çağırıblar. Xəstəxanada məlum olub ki, qızın bədəninin təxminən 40 faizində üçüncü dərəcəli yanıqlar var. Həkimlər reanimasiya tədbirləri görüblər, həmçinin baş nahiyəsindən xəsarət alması ehtimalını araşdırıblar. Daha sonra uşaq helikopterlə Ohayo ştatındakı ixtisaslaşmış klinikaya aparılıb.
Ata həkimə vaxtında müraciət etməməsini polis tərəfindən başqa bir iş üzrə axtarışda olması və yenidən həbs olunmaqdan qorxması ilə izah edib.
Makklendona ağırlaşdırıcı hallarla hücum və uşağın həyatını təhlükəyə atmaq da daxil olmaqla bir sıra ittihamlar irəli sürülüb. O, girov müqabilində azadlığa buraxılmaq hüququ olmadan həbsdə saxlanılır. İlkin məhkəmə iclası noyabrın 24-nə təyin edilib.
14:07 13.11.2026
Oxunuş sayı: 30
